PM Rui Levanta Disputa FM iha Asembleia ONU

Wptimmaster 13:11:07 OTL Internasional

DILI—Primeiru Ministru (PM) Rui Maria de Araújo, levanta disputa fronteira Tasi Timor entre Timor Leste ho Austrália iha Asembleia Jerál Organizasaun Nasoens Unidas (ONU), iha Nova Yorke.

PM Rui afirma, nu’udar viziñu, Timor Leste kontinua hametin relasaun di’ak ho Austrália nune’e mos Indonézia, maibé ba Austrália tenke rekoñese katak

ba Timor Leste to’o ba agora seidauk hetan ninia soberania tasi.

“Maske liu ona tinan sanulu resin haat hahú hosi Timor-Leste sai ona hanesan membru atus ida sianulu resin ida Organizasaun Nasoens Unidas nian, maibé ami seidauk iha fronteira marítima ne’ebé definidu ona ho ami nia viziñu marítimu na’in rua, Indonésia ho Austrália. Delimitasaun ba ami nia fronteira marítima sira sei asegura ami nia direitu soberanu sira no serteza kona-ba buat ne’ebé pertense mai ami, hodi ami bele asegura ami nia estabilidade ekonómika – ka ami nia auto sufisiénsia – no hodi garante futuru ida di’ak

ba ami nia povu no ba ami nia nasaun,” subliña PM Rui iha debate Asembleia Jeral ONU iha Nova Yorke, Tersa (27/09).

PM Rui iha nia intervensaun hatete, TL defende maka’as no buka hala’o diálogu no iha rezolusaun pasífiku ba disputa sira no fi’ar  ba sistema multilateral no direitu internasional, ne’ebé Estadu hotu-hotu hanesan iha lei nia okos, la sura ninia boot ka ninia riku-soin.

 

No bazeia ba prinsípiu hirak ne’e, ne’ebé bele garante ekuidade entre nasaun sira, maka TL hahú ho diskusaun sira atu bele delimita fronteira marítima  sira ho Indonésia, iha ámbitu direitu internasional nian, no TL hein atu ida ne’e mos bele hala’o ho Austrália, iha espíritu abertura, transparénsia no amizade nian ida.

 

Tanba razaun ida ne’e maka iha abril tinan ida ne’e Timor-Leste hahú ona ho prosesu konsiliasaun obrigatóriu ida – mekanizmu ida kona-ba rezolusaun litíjiu sira iha iha ámbitu Konvensaun Nasoens Unidas nian kona-ba Direitu baTasi.

 

Prosesu ida ne’e, ne’ebé foin ba da-uluk maka hala’o, hetan konseitu espesifiku ba kazu sira hanesan Timor-Leste, ne’ebé maka sai disputa kona-ba fronteira marítima sira ho viziñu ida ne’ebé maka sés-an tiha hosi prosedimentu rezolusaun kona-ba litíjiu vinkulativu sira tuir hakerek iha direitu internasionál.

 

Sorumutu ba da-uluk Komisaun Konsiliasaun nian hahú tiha ona iha loron 29 fulan agostu no TL fi’ar  katak painél hosi peritu independente sira sei kontribui, liu hosi análiza ba pozisaun país ida-idak nian, atu hetan solusaun ida amigável. TL fi’ar  katak Austrália, país ida importante ba TL nia rejiaun, bele hatán ho didi’ak, hodi partisipa no kontribui ho pozitivu hodi nune’e bele hetan solusaun ida justu no bele aseita hosi parte rua. (gus)

Similar Post You May Like

Recent Post

Banner

Online Hits

  • Online: 2 / 76 Hits: 1113 / 561560
  •