Deputadu CNRT preokupa ho Kalbuady nia Kazu

Wptimmaster 12:21:15 OTL Politika

DILI-Deputadu Araõ Noe hosi bankada CNRT interpreta Lei Kódigu  Penál  (KP), artigu 110, númeru  1 alinea D, ne’ebé hatete prosedimentu kriminál extinge, tanba preskrisaun, kuandu, hahú iha momentu ne’ebé ajente prátika krime, liu tiha ona prazu tinan 4, iha kazu sira seluk.

Tanba ne’e, Arão subliña, laiha ona dalan atu tribunál kontinua prosesa kazu angareasaun (malam dana/aruma osan) ba partidu CNRT liu ona tinan haat liu ba, ne’ebé Ministériu Públiku notifika Kalbuadi Lay ho Jacinto Rigoberto nu’udar arguidu.

Tuir Deputadu Arão Noe katak, kuandu kazu ne’e nia data prezu liu ona tuir lolo’os  ne’e arkuva ona, la’ós  halo fali tan notifikasaun, signifika parte Ministériu Públiku prátika abuzu de poder.

“Regras iha mais mósu diskusaun manas oituan tanba ida-idak interpreta tuir nia gostu, mais ba ha’u  problema ho Tribunál maka konaba baze legal, tanba tuir kódigu  penál  artigu 110 númeru  1 alinea D hatete kazu ne’e fóra de tempu laiha ona dalan atu halo prosesu,” dehan Deputadu Arão Noe Amaral ba Timor Post iha Parlamentu Nasionál, Tersa (11/10).

Maske nune’e, Ministériu Públiku haruka tiha ona kazu ne’e ba Tribunál Distrital Dili ho akuzasaun karak atúal Ministru Turismu no Arte Kultura (MTAK) Francisco Kalbuadi Lay ho eis Vise Ministru Solidaredade Sosiál (V-MSS) Jacinto Rigoberto de Deus, nu’udar arguidu ba kazu angareasaun fundus (Malam  dana),  partidu  CNRT nian.

Ministru Kalbuadi ho eis Vise  Ministru Jacinto nia kazu rejistu iha Tribunál Distritál Dili ho númeru prosesu 0026/16/ PGGCC, tanba deskonfia arguidu na’in rua nu’udar autór organija  angareasaun fundus hodi fó apoiu ba partidu CNRT iha eleisaun jerál  tinan 2012.

Kazu ne’e, Ministériu Públiku akuza ho krimi obstrusaun ba liberdade atu hili, viola artigu 236 kódigu penal Timor Leste nian.

Enkuntu tuir oráriu, arguidu na’in rua, sei tuir prosesu julgamentu iha loron 25 fulan Outobru 2016  tuku 9:30 0tl sei hala’o julgamentu iha Tribunál Distritál Dili. Maibé depende ba karta hasai imunidade ne’ebé tribunál haruka ona ba Parlamentu Nasionál  ho konteudu husu segundu orgaun atu hasai arguidu  nain rua nia imunidade hodi ba hatan iha tribunál.  

Entretantu Adjunta Prokuradora Jerál  Repúblika, Zélia Trindade dehan, kazu ne’e nia parte finaliza ona prosesu investigasaun no halo ona akuzasaun entrega ona ba tríbunal maka bele foti desijaun.

“Ami nia servisu hotu tiha entrega  ona ba tribunál  oinsá esforsu tribunál nian ba kazu ne’e,” Zélia Trindade ba Jornalista sira hafoin informa servisu Ministériu Públiku nian ba Prezidente Repúblika, Taur Matan Ruak, iha Palásiu Prezidensial, Bairu-Pite, Tersa (11/10).

Similar Post You May Like

Recent Post

Banner

Online Hits

  • Online: 2 / 76 Hits: 1107 / 561554
  •