Administrador Municipio Covalima, Jose Pina hakotu Is

Wptimmaster 09:04:39 OTL Distritu

DILI— DILI—Administradór Munisípiu Covalima, José Pina Cardoso, hakotu ona is iha Horpital Nasional Guido Valadares (HNGV), iha loron Kuarta (12/10), tuku 17:15 HTL, tanba sofre moras tensaun no diabetes.

Matebian nu’udar Koordenador Partidu CNRT munisípiu Covaliman nian. Durante tinan tolu liu matebian nu’udar Administrador Interinu Munisípiu Covalima. Simu ona kompeténsia nu’udar Administradór iha fulan kotuk no tuir ajenda iha loron 17 fulan ne’e mak simu pose, maibé matebian husik hela mundu.

Matebian hakotu is ho tinan 44, husik hela nia feen kaben ho oan na’in haat, feto rua-mane rua.

Matebian baixa iha ospitál Suai iha Segunda semana kotuk. Haré ba kondisaun grave, doutor sira rekomenda ba halo tratamentu iha HNGV. Família sira rasik mak akompaña to’o iha HNGV horiseik dader tuku 10 liu, tama kedas ba sala ICU. 

Lucinda Cardoso, nu’udar subriña rasik haktuir, família sira akompaña moras sai hosi Suai dadersan tuku 07:00.

“To’o iha ICU doutór sira halo kedas atendementu maibé lakonsege salva entaun tiu is kotu,” Lucinda ba Timor-Post iha sala Mortuáriu HNGV, Kuarta, (12/10) kalan.

 Iha fatin hanesan, Rui Baros, nu’udar mos matebian nia subriñu rasik ba Timor Post, haktuir, iha sala ICU doutor espesialista na’in hirak kedas maka halo tratamentu, maibé la konsege. “Doutor sira bolu ha’u rasik ho ha’u nia tian (matebian nia espoza) ba hetan esplikasaun katak matebian hetan moras ne’e kleur ona,” Rui haktuir.

Rui hatete, família hatene matebian moras kleur ona, maibé iha fulan tolu liu ba bainhira matebian atu hala’o vizita ba Xina, doutor sira halo teste moras laiha. Tanba ne’e família sira dúvida tebes ho matebian nia mate.

Nia haktuir, iha Suai iha intelektuál balun haré malu matan la moos. Tanba la’ós foin ba ida ne’e de’it, maibé iha administrador uluk mos foin simu pose mate kedas. “Ita la espera ita ema nia distinu, maibé mate ida ne’e hatudu tiha ona,” Rui dehan.

Matebian uluk sai hanesan aministrador ba postu administrativa Maukatar. Muda fali ba Sekretáriu iha administrador munisípiu nian, muda tan ba Adjuntu Aministradór Munisípiu Covalima no sa’e ba administradór interinu no kontinua hetan fi’ar ba Administradór Munisípiu.

Tuir ajenda, hafoin lori mateisin sai hosi HNGV lori ba hatoba lai iha uma iha Dili. Halo’ot tia ba kaixaun sei lori ba sede Partidu CNRT hodi hetan omenajen ikus, maka foin lori ba Suai hodi halo’ot tuir matebian nia lisan Sirigatal nian. (flo/cao)

Similar Post You May Like

Recent Post

Banner

Online Hits

  • Online: 7 / 499 Hits: 3066 / 1058505
  •