Adeus Obama, Benvindu Trump

Wptimmaster 19:20:24 OTL Internasional

DILI–Istória foun ba Estadus Unidus Amérika (EUA), Kuarta (09/11), Donald John Trump hosi Partidu Repúblikanu manán eleisaun jerál ba Prezidente EUA. Trump halakon nia adversáriu polítika Hillary Clinton hosi Partidu Demokrátiku.

Ho vitória ne’e Trump hein simu posse ba Prezidente EUA ba-dala 45 hodi troka Prezidente sesante, Barack Obama. Maske votu hosi fatin balun seidauk sura hotu horiseik, maibé Trump manán nafatin iha eleisaun ne’e ho votus 276. enkuantu Hillary hetan de’it votus 218 duni la toman.

 Horiseik kedas Trump fo kedas komentáriu ba mídia sira katak, Hillary telefone ona ba nia hato’o parabens.

 “Ha’u foin simu telefone hosi (Hillary) Clinton. Nia hato’o parabens ba ami,” Trump haktuir ba Jornalista sira hanesan sita iha mídia hotu iha Amérika.

Iha eleisaun 2008, Prezidente sesante Barack Obama kandidatu hosi Partidu Demokrátiku manán eleisaun bainhira kompete ho John McCain hosi Partidu Republikanu. Obama iha momentu ne’eba manán ho votus 365, inkuantu McCain hetan de’it votus 173. Obama eleitu hanesan Prezidente EUA ba-dala 44 troka eis Prezidente George W. Bush.

Nune’e mos iha eleisaun 2012, Obama kontinua manán nia adversáriu polítiku Mitt Romney. Rejultadu votasaun iha momentu ne’eba, Obama 303. No Romney 206.

Relasaun ho TL

Entretantu Embaixadora EUA iha Timor Leste, Karen Stanton, bainhira organiza eleisaun iha Embaixada  EUA iha Dili, subliña, relasaun Timor Leste ho EUA kontinua di’ak.

“Ha’u bele dehan kandidatu sé de’it maka manán nia polítika  relasaun ho Timor Leste kontinua nafatin hanesan agora promove demokrasia no dejenvolvimentu iha rejiaun Asia Pasífiku,” Karen Stanton ba jornalista sira iha Embaixada EUA, Praia Coqueiros, Dili.

Nia hatutan, iha TL sidadaun EUA hamutuk nain 60 maka tuir eleisaun iha Dili. Hafoin vota haruka hosi Koreiu ba EUA.

Iha fatin hanesan Eis Xefe Casa Sivil Presidente Repúblika Timor Leste, Fidelis Manghalãens subliña, kandidatu Trump ho Clinton di’ak hotu. Ida ne’ebé de’it maka manán importante liu ba Timor Leste maka relasaun kontinua la’o ba oin.

“Ba ha’u kandidatu rua ne’e di’ak hotu maibé Hilary maka koñese di’ak liu Timor tanba nia mai ona iha ita nia rai ko’alia ho ita nia Prezidente kona-ba kooperasaun lubuk ida,” Fidelis ba Jornalista sira bainhira ba asisti eleisaun iha Embaixada EUA iha Dili. (cao/way)

Similar Post You May Like

Recent Post

Banner

Online Hits

  • Online: 23 / 581 Hits: 6276 / 838856
  •