Tais Kafe Toneladas Rihun 20 Sirkula ona Iha Merkadu Domestiku

Wptimmaster 15:29:43 OTL Ekonomia

DILI—Iha tinan 2015 to’o iha 2016 nia laran, produsaun ba kafé lokál ne’ebé koñesidu ho naran Tais Kafé hamutuk toneladas rihun 20 ne’ebé konsege sirkula ona iha merkadu nasionál doméstiku.

            Kompaña Virgo Amor Lda, ne’ebé maka sai hanesan produtór ba Tais Kafé, enkoraja anfatin povu Timor-Leste atu konsumu deit produtu railaran nian, nune’e bele hasa’e ekonomia nasaun nian, liliu osan bele sirkula deit iha Timor-Leste.

            Diretór Kompaña Virgo Amor, Higino Trindade, hatete, Tais Kafé ne’ebé maka produs rasik iha railaran ne’e, nia kualidade diak no morin tebes tanba la-uza materiál kímiku hanesan produtu estranjeiru nian.

            “Tais Kafé ne’e hanesan kafé hemu ida ne’ebé pursentu 100 orijinál i morin ho kualidade diak, i la campur ho bahan kimia hanesan kafé ne’ebé maka importa hosi railiur mai iha Timor-Leste,”hatete Diretór Kompaña, Higino Trindade ba Timor Post iha Timor Plaza, Komoro-Dili, Kurta (23/11).

            Higino haktuir, esforsu hodi harii fatin ba produsaun Tais Kafé nian ne’ebé maka hahú iha tinan 2014, to’o ohin loron hetan susesu tanba mós apoiu hosi Governu, liliu Ministériu Komérsiu, Indústria no Ambiente (MKIA) nian.

            Apoiu refere, tuir Higino katak, la’ós de’it kona-ba morál maibé inklui materiál ba produsaun liliu mákina dulas kafé nian ne’ebé maka sosa hosi nasaun Xina.

            Kada loron, Diretór realsa, kompaña halo produsaun ba Tais Kafé hamutuk kaixa 10 no 9 mil saset, tanba ne’e iha periódu tinan ida, entre 2015 to’o 2016 konsege produs ona toneladas 20.

            Tuir planu ne’ebé maka kompaña iha, ba futuru hakarak atu aumenta tan kapasidade produsaun hodi distribui ba konsumidores kafé iha TL, liliu ba iha merkadu.

Kona-ba kafé ne’ebé maka kompaña sosa hodi halo produsaun, maioria mai hosi povu agrikultór sira iha Munisípiu Liquiça no Ermera rasik.

            Higino esplika, hakarak produs Tais Kafé ne’e ho objetivu atu promove diak liután kafé ne’ebé maka TL iha hodi kompete iha merkadu railaran ho kafé exportasaun hosi railiur nian.

            Hosi indústria ne’ebé maka harii, kompaña Virgo Amor konsege fó ona servisu ba Timoroan hamutuk na’in 10, maibé lataka dalan mós atu iha tempu oin mai bainhira ezijénsia hosi merkadu nian ba kuantidade kafé aumenta, kompaña sei presiza tan traballadór atu bele servisu.

            “Agora ami foin maka iha mákina packing no mákina dulas nian, i planu atu sosa tan mákina sona kafé nian, ekipamentu hirak ne’e balun sosa hosi Indonézia no balun hosi Xina no kona-ba plástiku ne’ebé maka tau kafé ne’e mós ami sosa hosi Indonézia no Xina,”informa nia.

            Maske nune’e, Diretór kompaña la fó esplikasaun detallu kona-ba rendimentu ne’ebé maka hetan liuhosi kafé toneladas rihun 20 ne’ebé maka distribui no fa’an ona iha merkadu doméstiku sira.(jxy)

Similar Post You May Like

Recent Post

Banner

Online Hits

  • Online: 3 / 200 Hits: 2212 / 555942
  •