Ministru Gastao rekonese Single Source ba Estrada Lautem

Wptimmaster 12:32:16 OTL Ekonomia

DILI – Ministru Obras Públiku  Transporte no Komunikasaun (MOTPK), Gastão  Sousa hatete, rajaun halo ajudikasaun direita ba rehabilitasaun estrada iha Munisípiu  Lautem, tanba orsamentu rektifikativu foin mak tama, entaun tenke halo de’it ajudikasaun direita.

Nia hatutan, rajaun hadi’a  lalais estrada ne’e tanba atu fasilita movimentu ba loron komemorasaun 28 Novembru tinan ida ne’e bele la’o ho di’ak.

“Fó de’it órden  tanba atu atende selebrasaun loron 28 Novembru ne’e rajaun seluk mos tanba rektifikativu foin mak tama iha lista,” hatete Ministru Gastão  ba Timor Post iha Parlamentu Nasionál, Sesta semana kotuk.

Ministru Gastão  hatutan, orsamentu rektifikativu ne’e foin mak tama iha Setembru, no orientasaun hodi rehabilita estrada ne’e foin mak hahú iha Outubru.

“Tuir nota informativu ida ha’u fó ne’e sambil sira halo, ami mos haré oinsá mak halo kontratu,” justifika ministru Gastão.

Entretantu, kustu projetu rehabilitasaun estrada iha munisípiu  Lautem ho natureza urjénsia falun metin ho misteiru, tanba maske projetu ne’e foti fó de’it (single source) ba Konsorsiu Ponta Leste Group, maibé owner project (nain ba projetu) ne’e mos seidauk iha serteza kona – ba kustu ne’e rasik.

Diretór  Luta Hamutuk, Mericio Akara hatete, projetu urjénsia iha Lautem ne’e hanesan repete de’it erru sira ne’ebé  mak antes ne’e govenru halo tiha ona. Kada tinan governu sempre halo avaliasaun katak sei la repete ona projetu sira ho natureza emerjénsia  no urjénsia, maibé ohin loron akontese fali. Ne’e signifika, governu laiha konsisténsia. Tanba, tinan kotuk deputadu sira iha Parlamentu Nasionál mos kestiona kona – ba dívidas  governu nian ne’ebé  aumenta hela de’it, tanba kauza hosi  projetu emerjénsia  no urjénsia sira ne’ebé  governu halo.

Akara hatutan, projetu urjénsia ne’ebé  hala’o hosi  Konsorsiu Ponta Leste Group ne’e iha negativu no positivu. Nia positivu, tanba sira sente katak nu’udar Lautem oan no uma kain ba festa komemorasaun loron 28 Novembru ne’e, entaun maske haruka de’it mos sira halo kedas, maibé nia negativu mak la asina kontratu ruma ho governu. Negativu ida ne’e mos, tanba orsamentu ida ne’ebé  mak atu fó ne’e la garantia hira, tanba kontratu laiha.

“Se Lautem oan sira mak uza sira nia osan rasik hodi halo estrada urjénsia ne’e, ita tenke orgulho, tanba ho sira nia osan, sira sai uma nain, maibé ida ne’e mai hosi  orsamentu Estadu nian. Entaun, hakarak ka lakohi tenke haré nia legalidade”, hatete Akara ba Timor Post iha nia serbisu fatin Farol – Dili foin lalais.

Akara hatutan, normálmente kuandu to’o ona loron bo’ot sira, membru governu no setor privadu sira sempre aproveita atu oinsá  bele hetan osan. 

“Labele fó sala ba loron bo’ot sira hodi halo sasan la ho kualidade, tanba tuir loloos loron bo’ot sira ne’e ita tenke hakmatek hodi halo serbisu hotu ho nia kualidade di’ak. Labele iha loron bo’ot ne’e ita halo azineira oioin hodi ikus mai fó sala fali ba loron bo’ot”, sujere Akara.

Akara mos husu ba Komisaun E Parlamentu Nasionál  no Komisaun Anti – Korupsaun (KAK) tenke halo fiskalizasaun ba projetu ne’e hodi garante nia kualidade di’ak.

Kronolojia hosi  projetu urjénsia ne’e haktuir hosi  Prezidente Konsorsiu Ponta Leste Group, Custodio Jose Lopes katak rehabilitasaun ka projetu estrada emerjénsia  ne’ebé  hala’o iha Luatem, tanba simu órden  hosi  Ministru Obras Públiku  Transporte no Komunikasaun (MOPTK), Gastão  Sousa iha loron 8 Outubru no iha loron 9 Outubru, nia halo mobilizasaun ba Lospalos no foin hahú halo serbisu iha loron 10 Outubru foin lalais. Entaun, totál  loron ba projetu emerjénsia  ne’e hamutuk loron 41 ona, maibé to’o oras ne’e seidauk iha asina kontratu. Bele dehan projetu emerjénsia  ne’e laiha dezenho Bill of Quantity (BoQ) no seluk tan.

“Ami rehabilita estrada ne’e bazeia de’it ba órden  hosi  Ministru Obras Públiku  no Transporte Komunikasaun. Laiha kontratu, maibé ministru promete sei fó ami nota informativu ida. Tanba ami la’ós  staff baibain ka direitor sira mak haruka ami, maibé ida ne’e ministru mak direitamente orienta dehan katak halo ami prepara nota informativu fó ba imi katak maske kontratu seidauk iha, mas halo ba. Ami fiar katak nia selu”, hatete Custodio. (oki)

Similar Post You May Like

Recent Post

Banner

Online Hits

  • Online: 4 / 200 Hits: 2211 / 555941
  •