Jose Luis Guterres Re-eleitu ba Prezidente PFM

Wptimmaster 08:16:05 OTL Politika

DILI—Liuhosi kongresu nasionál ba-dala-rua durante loron rua (07-08/12), iha Salaun Don Bosco, Comoro, delegadu sira hosi munisípiu 13 liu rihun ida maioria kontinua hili José Luis Guterres, nu’udar Prezidente Partidu Frenti Mudansa (PFM), ba periodu 2017-2022.

Kandidatu ba Prezidente PFM iha kongresu ne’e, iha pakote rua maka José Luis Guterres ho Vicente Maubossi.  

Delegadu sira hosi Munisípiu 13, inkui ho organizasaun Massa rua, mak hanesan organizasaun Joventudi Frente Mudança, no organizasaun feto Frente Mudança no organizasaun Feliadas hitu, inklui Brigada Soke Frente Mudança,  Fitun Mudança, hanaran ekipa Anin Fuik no seluk tan.

Partisipa iha abertura kongresu PFM ne’e, Sekretáriu Jerál FRETILIN, Marí Alkatiri, Sekretáriu Jerál CNRT, Dionisio Babo, Sekretáriu Jerál PD, Mariano Assanami Sabino no lideransa hosi partidu seluk.

iha intervensaun Prezidente PFM, José Luis Guterres, hatete, PFM, FRETILIN ho Partidu Demokrátiku (PD) mai hosi  knua ida de’it mak FRETILIN hodi forma uma kain ketak atu lori dezenvolvimentu ba povu Timor Leste (TL) no haburas sistema demokrasia iha nasaun foun ne’e.

            Prezidente PFM, José Luis Guteres dehan, partidu FRETILIN, PFM ho PD mai hosi knua ida de’it. Kuartu maka ketak, tanba ne’e hola parte iha sistema demokrasia hodi bele lori povu ba moris di’ak.

            “Ami Mudansa ho PD hamutuk ho FRETILIN ita uma ida de’it kuartu maka ketak, ita nia mehi maka serve ita nia povu no lori povu ba moris di’ak,”dehan José Luis liuhosi nia intervensaun iha II Kongresu Partidu Frenti Mudansa iha salaun Dom Bosco, Komoro, Kuarta (07/12).

            Tanba ne’e nia agradese tebes ba lia menon hosi Sekretáriu Jerál FRETILIN, Marí Alkatiri, Sekretáriu Jerál PD, no Sekretáriu Jerál CNRT.

            Iha fatin hanesan, Sekretáriu Jerál FRETILIN, Marí Alkatiri dehan, loron furak tebes reprejenta FRETILIN hato’o no lori saudasaun espesiál lori Prezidente FRETILIN nia naran hato’o saudasoen ba kongrekista tomak PFM nian.

            “Ha’u dehan loron espesiál tanba foin tinan ida ne’e ita muda lei dos feriadus nasionais 7 Dezembru loron memoria bainhira ita partisipa iha prosesu istoriku ida memoria akompaña ita, memoria ne’e bainhira ita halibur, fahe malu, hirus malu no di’ak malu ne’e sai memoria hotu,”dehan Alkatiri.

            Tanba ne’e nia dehan, importante ba nia nu’udar Sekjer FRETILIN nian hateke ba Kamarada sira iha PFM halo parte iha memoria ona, saida maka akontese ne’e hola parte iha memoria ne’ebé rejistu ona, atu sai istoria tenki hatene interprete, ne’e bele hasai lisaun di’ak ou la di’ak.

            “Ha’u husu ba kongrekista hotu katak memoria ita nia ne’e, ita rejista ba interpreta ba atu sai istoria komun para sai di’ak ba ita hotu, tanba rai ida ne’e presiza ita hotu hamutuk para lao ba oin,” dehan Alkatiri.

            Nia hatutan, la iha tan dalan seluk dalan maka tenki hamutuk, halo luta para liberta rai ne’e, agora tenki hamutuk luta lori povu ba moris di’ak no luta ne’e seidauk hotu, tenki investe iha paz no estabilidade hodi lori dejenvolvimentu ba rai no povu ida ne’e presiza ema hotu nia hamutuk.

            Tanba ne’e nia husu ba kongresu PFM nian ne’e atu lao ho susesu atu nune’e sai hosi kongresu ne’e belelori buat diak ba partidu ne’e rasik.

            Entertantu, Sekretáriu Jerál PD Mariano Asanami Sabino dehan, PD hahu hosi estrutura hatoo parabens ba kongresu no hein katak lao ho susesu, hanesan dehan tiha ona PFM ho PD mai hosi knuk ida maka FRETILIN.

            “Frenti Mudansa ho PD ita ne’e mai hosi knuk ida de’it maka FRETILIN uluk ami hotu hanoin luta remata ne’e hotu hamutuk reforsa FRETILIN maib’e ita moris ho multipartidaria maka ami iha PD kontinua hakruk ba FRETILIN, ami tutan FRETILIN nia mehi,” hameno Asanami.

            Nune’e mós Sekretáriu Jerál CNRT Dionisio Babo dehan, lori maun Xanana nia naran hakarak hatoo de’it felisidade ba kongresu ne’e hodi sai rejultadu di’ak.

            “Ita iha hanoin ida de’it atu oinsá maka liberta ita nia povu hosi nakukun laran, iha konjuntura politika foun ita boot sira ne’e reprejenta jerasaun ne’ebé ita hotu hamrik ba atu hatutan ita nia jerasaun tuan sira harii ona atu lori nasaun ne’e ba prospiu tuir ita hotu nia mehi, ita espera katak kongresu ne’e sai fatin deskuti no desidi lideransa PFM nian,” dehan Dionisio.

            Tanba ne’e lori CNRT nia naran hakarak felisita de’it kongresu PFM nian, no bele susesu no prontu simu rejultadu.

            Kongresu PFM nian ne’e halao durante loron rua hahu hosi (7-8 Dezembru) hodi hili sira nia lideransa hodi lidera Partidu ne’e durantente tinan lima nia laran. (max/way)

 

Similar Post You May Like

Recent Post

Banner

Online Hits

  • Online: 2 / 76 Hits: 1109 / 561556
  •