Hanoin Hikas Sergio Vieira de Mello

Wptimmaster 17:26:39 OTL Internasional

DILI—Sábadu  (10/12) Timor Leste Komemora Loron Internasional Direitus Umanus ba-dala 65, Prezidente Repúblika  (PR), Taur Matan Ruak entrega Prémiu Direitus Umanus Sérgio    Vieira  de Mello edisaunIX, ba manan nain sira ba tinan 2016 nian.

Prémiu Direitus Umanus Sérgio   Vieira  de Mello, inisiativa hosi eis Prezidente Repúblika, Ramos Horta. Foti naran Sérgio   Vieira  de Mello, tanba Sérgio   Vieira  de Mello mak esabelese governu tranzisaun iha Timor Leste hafoin manan referendum 1999.

Sérgio Vieira de Mello, ema hosi Brazil nu’udar diplomata ida ne’ebé servisu durante tinan 34 ONU. Nia hetan respeitu bo’ot iha ONU durante hala’o nia kna’ar iha nasaun barak iha mundu liuliu ba programa umanitáriu no polítika.

 

Sérgio Vieira de Mello, moris iha loron 15 Marsu 1948, iha Rio de Janeiro, Brazil. Hafoin remata misaun iha Timor Leste, no kontinua misaun iha Irake maka mate iha loron 19 Agostu 2003, iha Baghdad, Irak.

 

Sérgio Vieira de Mello, mate husik hela oan, Laurent Vieira de Mello, Adrien Vieira de Mello. Sérgio Vieira de Mello nia inan-aman, Gilda de Mello, Arnaldo Vieira de Mello. Sérgio Vieira de Mello iha nia feton ida naran,Sonia de Mello.

 

Kada tinan Prezidente Repúblika fó prémiu nu’udar símbolu rekoñesimentu ba sira ne’ebé ho nia atividade  esforsu no kontribuisaun fó ajuda no taumatan ba ema seluk ne’ebé presisa iha Timor Leste.

Prezidente Repúblika, Taur Matan Ruak liuhosi nia deskursu ba komemorasaun loron Internasional Direitus Umanus iha Palásiu  Prezidensial, Bairo Pite, Dili, Sábadu  (10/12), subliña, prémiu ida ne’e mos fó omenajen bo’ot ba saudozu Sérgio    Vieira  de Mello tanba ema ida ne’ebé iha tenpu defisil lidera transisaun iha Timor Leste.

“Ho nia pasensia no nia umanismu no nia dedikasaun konsege lori transisaun ida ne’ebé di’ak konsidadera hanesan susesu maibé to’o ikus nia mate iha Irakia” Prezidente Repúblika, Taur Matan Ruak, subliña iha nia diskursu.

Nia hatutan, prémiu  Direitus umanus destingi no promove inisiativa servisu komunidade nian partisipasaun sidadaun sira nian no organizasaun sosiedade sivíl  sira ne’ebé inportante tebes hodi hametin direitus umanus iha rai ida ne’e

Nia dehan, partisipasaun sidadaun hari iha ita nia rai no konsilida ita nia instituisaun iha ita nia rai no mos servisu atu hametin paz ne’e preoridade ba timor oan tomak, tanba Respeitu ba direitus umanus ne’e ema hotu-hotu nia tanba ne’e kondiasaun inportante ida atu hametin paz armonia sosial no partisipasaun sidadaun sira nian iha dezenvolvimentu ekonomika no instituisaun demokratiku iha ita nia rai

Tuir Xefe  estadu ne’e mos hatete, ho nia kapasidade dialogu hatene rona ema no servisu ekipa ho autoridade sira liu-liu ba timor oan sira ne’ebé la iha esperensia no primeira vez tenta atu hari nasaun, depois mai hosi konflitu ida ne’ebé naruk maibé konsege nia hari ponte ida ba timor oan sira liu-liu lideransa timor oan konsentra ho buat ida ne’ebé inportante hodi lori transisaun ida ne’e ho susesu.

“Rekoñese  internasionalmente katak transisaun Nasoens Unidas halo iha Timor Leste ne’e di’ak  no susesu deve mos Sérgio    Vieira  de Mello nia servisu, mesmu nia mate mas nia obra no memoria permanese no Timor Leste halo ida ne’e hanesan mos omenajen ida ba nia” dehan Xefe  estadu ne’e

Tuir Xefe  estadu ne’e katak, Prémiu  Sérgio    Vieira  de Mello destingi dala ida tan ba organizasaun no ba ema ne’ebé dezenvolve nia atividade ba servisu komunidade o kontribui ba hadi’a  situasaun populasaun sira ne’ebé vuneravel iha formas oin-oin

Aliende ida ne’e mos Xefe  estadu ne’e hatete, Judicial System Monitoring Programme (JSMP) ne’ebé kontribui no hadi’a  justisa iha rai ida ne’e hetan dezenpenu di’ak  tanba sosiedade sivíl  ida forte ne’e di’ak  ba nasaun tanba bele evita abuzu de poder no propotensia iha nasaun ida tanba ne’e prezidente fó louvor ba atividade ida ne’e

“Organizasaun la’ós  aseita no konforme buat ne’ebé ita halo mas liu-liu hetan koranjen para hatete ba ema liu-liu autoridade sira ba buat ne’ebé la bele halo, inportante liu maka evita sosiedade ida ne’ebé koformismu demais tanba nasaun ne’e hari hosi sidadaun nia esforsu rasik tanba ne’e ha’u  fó paraben ba JSMP ho nia ekipa tomak” nia agradese

Entertantu ema no instituisaun hirak ne’ebé simu Prémiu maka hanesan Judicial System Monitoring Programme (JSMP), Graciana da Silva-Fundasaun Moris Foun Liquiçá (FMF), Orfonatu Mate La Mohu Kiak Serve Kiak, Fundasaun An-Nur, Padre Francesco Moser no Padre Pierluigi Fornasier-Padres hosi Ataúro, Marciana da Graça-Profesora hosi Eskola Filial Koileki.

“Ha’u  fó parabens ba premiadu sira tanba fó ona imi nia kontribuisaun mak’as hodi fó apoiu ba ita nia povu no nasaun tanba ne’e estadu no nasaun sei la haluha imi nia servisu maibé husu para hadi’a  di’ak  liu tan maibé labele to’o iha ne’e deit” nia afirma.

Iha fatin hanesan Diretór  Exekutivu Judicial System Monitoring Programme (JSMP) Luis Sampaio dehan, prezidente ho nia ekipa konvida ami mai hanesan sai manan nain ba prémiu  Sérgio    Vieira  de Mello tanba Prezidente hanese rekonesimentu ida durante ne’e JSMP halo.

“Prezidente fó korajen ba JSMP atu kontinua JSMp nia kontribusaun ba seitor justisa tanba Prezidente dehan ema balu la kontente tanba ami koko atu desafia no divulga buat ne’ebé maka los, relasiona ho polítika  ne’ebé maka estadu halo no mos asegura katak justisa ne’e funsiona ba ema hotu,” dehan nia

Entertantu observasaun hosi Jornalista Diáriu Timor Post nota katak, iha komemorasaun loron Internasionan Direitus Umanus ne’e ladun hetan partisipasaun másimu hosi membru governu no deputadu sira. (mj1)

Similar Post You May Like

Recent Post

Banner

Online Hits

  • Online: 7 / 76 Hits: 1083 / 561530
  •