FRETILIN Mantein Lu-Olo ba Kandidatu PR

Wptimmaster 18:22:01 OTL Politika

DILI---Prezidente Partidu FRETILIN, Francisco Guterres Lu’Olo, deklara sei kandidata-a’an ba Prezidente Repúblika (PR) periodu 2017-2022. Desizaun ida ne’e nia foti tanba kontinua hetan suporta no apoiu hosi militante FRETILIN tomak Timor laran.

Francisco Guterres hatete, hosi inísiu tinan ida ne’e nia simu mensajen no deklarasaun apoiu hosi kamarada sira iha rejiaun hotu iha Timor laran, hosi veterenus no hosi timor oan ne’ebé maske la’ós  militantes FRETILIN maibé kontinua tau konfiansa ba nia.

 “Ha’u Infórma ba militantes no Kuadru Fretilin sira hotu ba dahuluk no ho konfórmidade ho estatutu partidu FRETILIN nian katak ha’u rasik, Francisco Guterres Lu’Olo, Por Natureza mak nu’udar kandidatu partidu FRETILIN nian ba Prezidente RDTL ba mandatu 2017-2022 iha eleisaun ne’ebé sei hala’o iha tinan oin,”deklara Francisco Guteres Lu-Olo iha Salaun Comite Central da Fretilin (CCF), Comoro-Dili, Segunda, (12/12).

Francisco Guterres haktuir, iha IV kongresu FRETILIN nian, nia mós simu deklarasaun apoiu tomak hosi kongresistas ne’ebé reprezenta munisipiu 12 inklui Rejiaun Administrativa Espesial 1, OMPT, Juventude FRETILIN, Organizasaun Filiada sira, Grupu Tékniku no grupu ativistas sira.

Iha reuniaun komisaun polítika nasionál ne’ebé hala’o iha loron 8 fulan Dezembru tinan 2016, CPN atu koresponde ba vontade geral sira, rona prezidente partidu no delibera atu fó apoiu ba prezidente partidu nu’udar kandidatu FRETILIN nian ba prezidente repúblika iha eleisaun 2017 nian.

“Ha’u hakarak aproveita oportunidade ida ne’e atu dala ida tan agradese apoiu tomak ne’ebé fó mai ha’u no ho onra boot mak ha’u simu dezafiu ida ne’e tan no ha’u iha serteza katak hamutuk ita hotu sei manan,”tenik nia.

Lakleur tan Prezidente Repúblika atual, Taur Matan Ruak sei hasoru malu ho partidu polítiku hotu-hotu atu koa’lia kona-ba data ba eleisaun Prezidensial ba mandatu 2017-2022.

Maibé nia dehan, bainhira prezidente repúblika atual fó sai ofisialmente kalendariu ba aprezentasaun kandidatura, maka nia sei halo anunsiu ofisial dala ida tan ba públiku tomak kona-ba nia kandidatura.

Francisco Guterres hatutan, karik hetan konfiansa ba prezidente republika mak nia sei halo servisu bazeia de’it ba kna’ar Orgaun Soberania prezidente repúblika nian tuir Lei no konstituisaun sira haruka, nune’e mós sei hamutuk ho Orgaun Soberania sira seluk hanesan Parlamentu Nasionál, Governu no Tribunais.

Nia mós fó bemvindo ba apoiu sira ne’ebé fó ba nia atu kandidatu ba Prezidente Republika ne’e karik liu hosi partidu seluk, Grupus ou Individus sira.

Entertantu iha fatin hanesan, Sekretáriu Jeral Partidu FRETILIN, Marí Alkatiri hatete, Prezidente Lu-Olo sempre kandidata maibé nunka lakon no sempre manan maibé komputador mak halo lakon.

Nia haktuir, fóin lalais kuandu FRETILIN de’it halo eleisaun iha 200 mill militantes mak vota ba sira nain rua, votantes balun atu vota mais bulletin de votu mak la to’o tanba sira la espera katak ema atu barak hanesan ne’e.

“Prontu ita hein de’it Militante ida atu lori tan de’it nia ema ida ba vota ba Prezidente Lu-Olo los ona nia liu ona, maibé la’ós  ida ne’e de’it, se akompaña dadauk konjuntura politika agora ninian, 2007 no 2012 sei la repete fila fali, ne’e ha’u  individual nia konviksaun mak ida ne’e eleisaun Prezidente mai sei laiha segundu ronde tanba Prezidente Lu-Olo sei lori kedas,” hatutan Alkatiri. (rio)

Similar Post You May Like

Recent Post

Banner

Online Hits

  • Online: 16 / 286 Hits: 1047 / 1062400
  •