Udan ‘Tiru’ Borus Uma Luxu Ministeriu Finansa Foun

Wptimmaster 18:33:44 OTL Kapital

DILI—Udan been tama (tiru) hosi andar tutun borus ba plafon iha andar sanulu (10) edefísiu foun Ministériu Finansas (MF), iha Aitarak-Laran, Dili. Plafon ne’ebé foin taka hatudu ona sinál dodok.

Servisu na’in sira iha edefísiu ne’e kontinua halo servisu maka’as hodi kompleta data center no interior fitment hosi andar karaik, inkuantu iha andar sanulu presiza taka ku’ak ne’ebé iha atu udan been labele halo estraga no bele rejulta gastus bo’ot liu tan.

Observasaun Jornalista Timor Post, iha Sesta (09/12), hahú hosi andar ida ba to’o andar sanulu hatudu ona progresu balun. Inklui jardin iha areadores edefísiu ne’e di’ak ona, servisu data center no  interior fitment to’o ona iha andar haat.

Servisu nain sira hosi kompañia ne’ebé manán projetu data center no interior fitment kontinua halo servisu maka’as.

Jornalista dada lia ho servisu na’in sira hatete, iha andar sanulu ne’ebé udan tama ne’e iha fatin ne’ebé tuir planu uza hanesan gabinete ba Ministra Finansas.

Servisu na’in sira dehan, sinal ne’ebé halo udan been suli tama borus to’o plafon ne’e sei taka ho alkatraun.

“Ministra Finansas nia fatin bocor (udan been turuk) hosi leten mak tama ba laran, tanba ne’e tuir planu dehan kompañia BTK mak sei mai atu fui fali alkatraun iha leten,” haktuir servisu nain ida ne’ebé lakohi públika nia identidade ba Timor Post iha Edefísiu foun MF, Aitarak Laran, Sesta, (09/12).

Fonte ne’ebé akompanha Jornalista durante observasaun iha edefísiu foun ne’e haktuir, tuir lolo’os jornalista labele tama ba edefísiu laran tanba  iha ona orden hosi leten. Maibé, fonte ne’e subliña, públiku iha direitu atu hatene kona-ba edefísiu bo’ot ne’ebé gasta osan estadu nian nia progresu to’o ona iha ne’ebé.

Entretantu bainhira Jornalista halo konfirmasaun kona-ba situasaun edefísiu ne’e nian ho Vise Ministru Finansas, Helder Lopes, hakfodak bainhira rona Jornalista tama ba edefísiu laran to’o andar sanulu.

“Halo nusa mak ó tama?, ó tama too leten?, ok los ona, entaun ó haré hotu ona,” Helder hatan ba Jornalista Timor Post. “Alin sira (Jornalista sira red), edifisiu ne’e hanesan uluk ha’u hatete, kuandu buat hotu-hotu la’o di’ak tuir planu ne’ebé mak iha, inísiu tinan oin ita muda ba iha ne’eba,” Vise Ministru Helder Lopes ba jornalista sira iha Palásiu Governu, Tersa, (13/12).

Helder rekoñese, servisu kona-ba data center no  interior fitment seidauk hotu. Tuir nia hatene to’o andar rua kompletu ona no tuir planu ekipa IT Ministériu Finansas nian atu muda hosi edefísiu tuan ba foun iha fulan ne’e nia laran.

enkuantu kona-ba udan been suli tama iha andar sanulu ne’e, Helder lakohi fó komentáriu. “Ha’u lakohi responde, ko’alia buat seluk,” Helder hatan ba Jornalista sira no la’o dadauk.

Edifísiu foun ne’e hahú konstroi hosi Empreza Estadu Indonézia nian, PT Pembangunan Perumahan (PT PP) (Persero) Tbk, iha inísiu tinan 2012. Tuir kontratu hala’o konstruksaun durante fulan 18. Ikuas mai hetan inaguransaun bainhira Prezidente Repúblika Indonézia (RI), Sosilo Bambang Yodhoyono hala’o vizita mai Dili, iha Agostu 2014.

Governu hahú gasta osan ba edefísiu ne’e hosi loke konkursu públiku iha tinan 2011. Governu hasai osan hahú iha tinan 2011 hamutuk milaun $44.086, governu aloka orsmentu milaun $5.430, iha tinan 2012, aloka tan osan milaun $7.392, iha tinan 2013, governu kontinua aloka tan osan milaun $9.810, tinan 2014 governu aloka tan osan milaun $15.460, iha tinan 2015 governu aloka tan osan milaun 6.820, enkuantu ba projetu interior fitment governu aloka tan osan milaun 3.422 inklui back up ba edifísiu hamutuk milaun $4.

Hafoin inaguransaun edefísiu ne’e hetan krítika maka’as hosi públiku to’o agora tanba liu tiha ona tinan hira hosi serimónia bo’ot inagurasaun nian maibé seidauk uza edefísiu ne’e.

 

Iha semana kotuk Diretór Ezekutivu Luta Hamutuk (LH), Merício Akara, afir,a tempu ona ba Komisaun Antí Korupsaun (KAK), Inspetor Jerál Estadu (IJE) ka Ministériu Públiku (MP) loke investigasaun atu hatene razaun saida maka governu kontinua gasta osan ba edefísiu ne’e no to’o agora seidauk uza.

 

Akara dehan, agora kompañia sira halo projetu data center no interior fitment sobu hotu uma nia plafon no udan been hahú turuk, ne’e tanba la iha kualidade, la iha kualidade tanba prosedumentu sira antes ne’e la la’o  tuir. (gus)

Similar Post You May Like

Recent Post

Banner

Online Hits

  • Online: 1 / 199 Hits: 2148 / 555878
  •