GOMMD Ho Polisia Haterus Vendedor

Wptimmaster 20:40:02 OTL Kapital

DILI—Tama ba loron natal no tinan foun, Ekipa Operasaun Merkadu Munisípiu  Dili (GOMMD), hamutuk ho PNTL sei kontinua prende sasan vendedores ne’ebé fa’an iha dalan ninin. Parte seluk vendedor sira hato’o keixa ba membru parlamentu nasionál tanba sira nian sasan no produtu barak hetan estragus.

Xefe GOMMD, Berta Vieira hatete, operasaun ida ne’e la’ós  foin halo maibé rutina, objektivu operasaun ida ne’e atu kria ambiente ida di’ak, no moos no evita engravamentu iha capital Dili, satán oras ne’e besik tama ona natal no tinan foun.

Operasaun ne’e ekipa GOMMD halo bazeia ba dekretu lei númeru 33/2008. Tanba ne’e la tolera vendedor sira ho kualker tipu saida de’it atu halo negósiu iha estrada ninin.

“Ita nia operasaun kontinua ba venedores iha sidade laran ne’ebé okupa fatin públiku, ba vendedor sira bainhira kontinua fa’an iha estrada ibun no loja oin Jestor mekradu ho ekipa integradu PNTL sei prende hotu,” dehan Berta Vieira ba Timor Post iha Edifísiu  Munisípiu  Dili, Sesta, (16/12).

Berta hatete, durante ne’e  GOMMD hala’o operasaun iha tuku 8:00 to’o 11, no kontinua fali iha tuku 3 to’o tuku 7:00, maibé agora sei halo mós operasaun iha tempu kalan.

Vendedor sira ne’ebé fa’an iha dalan ninin maioria  utiliza gerobak, vendedor sira ne’e fa’an hela iha merkadu sira maibé sei kontinua halo tan gerobak hodi fa’an iha dalan ninin.

Sekarik vendedor sira abandona merkadu hodi fa’an iha fatin públiku ekipa integradu sei prende sasan hirak ne’e hodi lori ba orfanatu no defisiente sira iha Dili laran. No gerobak sira ne’ebé GOMMD prende sei lori ba sunu iha Tibar. Operasaun refere la’ós  ba de’it vendedores nasionál, maibe ba vendedor estranjeiru.

Vendedores Triste

Iha parte seluk, relasiona ho operasaun GOMMD nian, vendedor barak maka ba hato’o  keisa iha Parlamentu Nasionál (PN), tanba iha operasaun ne’e ekipa GOMMD baku rahun hotu vendedor sira nian sasan.

“Ha’u keisa mai iha parlamentu nasionál tanba guarda munisipál  Dili halo operasaun sira baku rahun hotu ha’u nia gerobak bakso, ha’u susar tebes tanba durante ne’e ha’u uza grobak ne’e hodi buka ha’u nia moris hodi sustenta família,” informa, David Suares nu’udar vendedor ba jornalista iha Parlamentu Nasionál, Sesta, (16/12).

“Ha’u fa’an sasan sira ne’e iha fatin motael maibe la hatene hodi kalan tuku 9 sira halo operasaun ba iha fatin ne’eba sira baku rahun hotu ami nia sasan, la’ós  baku rahun de’it ha’u nia maibe ba maluk sira seluk mós hetan hotu rahun ne’ebé ami sente triste tebes bainhira haree ami nia sasan rahun,”dehan david ho triste.

David hatete durante ne’e nia la hetan servisu no nia moris ho fa’an sasan ho gerobak, tanba ne’e ho sasan sira ne’ebé maka estragus ona oinsa nia atu sustenta família uma laran liu-liu oan sira nia eskola.

Prende La’ós  Harahun

Hatan ba keisa ne’e, deputadu Natalino dos Santos Nacimento lamenta tebes ho atitude membru GOMMD tanba implementa asaun la tuir lei haruka.

Deputadu hatete, los duni katak capital Dili persiza sai sidade ida moos maibé asaun ne’ebé GOMMD halo la tuir ona regras, lolos labele baku rahun tanba vendedor sira buka sira nian moris.

“Ha’u husu ba vise ministru tenke fo atensaun ba iha municipiu liliu fo orentaaun ba ninia ema ne’ebé tun ba halo opersaun ne’ebé la tuir regras, keta ba baku rahun sidadaun sira nia sasan tanba sira ba buka sira nia moris,”lamenta deputadu Natalino iha uma fukun PN, sesta, (16/12).

Nia mós lamenta atitde ekipa GOMMD ne’ebé mos sasan nebe vendedor fa’an dook hosi estrada, lolos ida ne’e labele tanba la’ós  iha fatin públiku.

Movimentu Menus

Relasiona operasaun hosi ekipa Jestor Operasaun Merkadu Munisípiu  Dili konsege reduz movimentu animal iha sidade laran ne’ebé sempre fó impaktu ba movimentu tranportes públiku liliu estraga imajen nasaun nian.

“Loron tolu liu ba ita la patrolla ba animal, agora ita haree katak movimentu animal iha sidade laran redus ona,” dehan Xefe Jestor Operasaun Merkadu Munisípiu  Dili, Berta Vieira ba Timor Post iha edifísiu  Administrasaun Munisípiu  Dili, Sesta, (16/12).

Animal ne’ebé sei la’o iha hela iha moruhun bainhira ekipa GOMMD hetan keixa hosi komunidade sira, maka ekipa sei tuun dereitamente ba komunidade sira hodi fó samada atensaun, bainhira loron tolu komunidade la kumpri maka ekipa prontu atu ba destroi.

“Ita moos oho asu barak tanba lei hakerek kualker animal, ema ne’ebé hakiak animal labele abandona iha sidade laran, agora dadaun ami oho asu sira ne’ebé nakonu iha lisu fulan ne’e nia laran ami oho ona asu rua,” nia dehan.

Ba futuru GOMMD sei kontinua halo operasaun ba Estrada públiku iha capital Dili, tanba asu dalabarak hamosu dezastre ba ema ne’ebé lori transporte públiku motor no kareta, maibé ba oin sei kontinua halo operasaun ba animal iha sidade laran. (yto/ljs/lj1)

Similar Post You May Like

Recent Post

Banner

Online Hits

  • Online: 23 / 580 Hits: 6234 / 838814
  •