Eis Ministra Finansa Kadeia Tinan 7, Eis Vise Ministra Saude Tinan 4

Wptimmaster 02:43:01 OTL Nasional

DILI—Tribunál Distrital Dili (TDD), liuhosi Prezidente Juis Kolektivu, José Maria Araújo, kondena ona eis Ministra Finansas, Emília Pires kadeia tinan 7 no eis Vise Ministra Saúde, Madalena Hanjam kadeia tinan 4.

Iha leitura akordaun, tribunál absolve tiha akujasaun hosi Ministériu Públiku kona-ba krime administrasaun denoza tuir artigu 274 kódigu penál, no kondena kondenada nain rua ho krime partisipasaun ekonómika no negósiu tuir artigu 299 kódigu penál, relasiona ho projetu sosa kama ba ospitál nasionál no referál sira iha governu AMP.   

Tribunál mos absolve akujasaun kona-ba krime prejuiju ba estadu RDTL, tanba tribunál konsidera arguida nain rua la komete krime ne’e.

Tanba ne’e, tribunál desidi arguida nain rua sei la selu indimizasaun ba estadu, maibé sira tenke selu kustu judisiáriu kada ema US$100.00.

Iha okajiaun tribunál mantein desizaun antes aplika medida detensaun ba kondenada Emília, no Hanjam kontinua ho estatutu termu identidade rejidénsia (tahanan rumah) durante prosesu rekursu. Tribunál fó tempu ba arguida nain rua durante loron 15 hodi halo rekursu.

Hafoin leitura akordaun iha TDD, Tersa (19/12), kondenada Hanjam afirma, sei halo rekursu ba Tribunál Rekursu tanba nia sente desizaun TDD nian ne’e la justu, tanba iha momentu ne’eba nia kumpri de’it órden hosi eis Primeiru Ministru, Xanana Gusmão.

"Ha’u só  kumpri órden tanba kama hirak ne’e di’ak ba povu, atu  benefisia povu, la’ós ha’u. Osan ne’e la’ós mai ha’u, ba kompañia ne’ebé sira rekomenda no ninia uzu ne’e di’ak tuir rekomendasaun hosi tékniku sira,” Hanjam afirma ba Jornalista sira iha TDD horiseik.

Kazu Emília ho Hanjam, hala’o julgamentu iha Tribunál Distritál Dili (TDD) durante tinan ida-fulan rua-loron 15 horiseik foti desizaun finál.

Partisipa iha audénsia julgamentu foti desizaun finál ne’e, hosi Ministériu Públiku, Prokuradora Angelina Saldanha ho Prokuradór Jacinto Babo, no kondenada nain rua nia advogadu.      

Tuir observasaun Jornalista haktuir, kondenada Hanjam no família barak mak ba asiste audénsia ne’e, inkuantu kondenada Emília laiha fatin. (jxy)

 

Similar Post You May Like

Recent Post

Banner

Online Hits

  • Online: 4 / 200 Hits: 2205 / 555935
  •