Burokrasia sei iha Governasaun PM Rui

Wptimmaster 07:21:37 OTL Kapital

DILI—Prezidente Partidu Repúblikanu (PR), João Mariano Saldanha hatete, nia lamenta tebes ho governasaun ne’ebé lidera hosi Primeiru Ministru Rui Maria de Araújo, tanba durante ne’e nia haree burokrasia iha Instituisaun estadu nian maka’as tebes hodi prejudika atendementu públiku.

 

“Horbainruak dia vinte dois Segunda-kalan (22/05), ha’u hatete ba Primeiru Ministru, Primeiru Ministru (PM Rui-red), imi dala ruma, ita iha levél polítika ne’e ita deside tiha ona, ita ko’alia tiha ona, ita tún ba kraik ne’e ita book la bá,” Prezidente PR, João Saldanha informa ba jornalista sira iha Salaun Timor Institute of Development Studies (TIDS), Sábadu, (27/05) hafoin Konferénsia Lider Nasionál (KLN)-PR.

 

Tuir nia haree, durante ne’e burokrasia todan tebes iha Ministériu Justisa, liu-liu diresaun halo passaporte nian, tanba Timoroan barak maka trata passaporte tenke hein hosi madrugada tuku tolu ka tuku hat, maibé dala ruma la konsege halo passaporte.

 

Nune’e mós iha Ministériu Obras Públika no Transporte no Komunikasaun, liu hosi diresaun trata karta kodusaun, burokrasia ne’e todan tebes tanba tenke liu prosseu barak tebes, liu-liu iha kapitál Dili nian.

 

“Ita ba halo passaporte ita tenke ba hein, hosi tuku lima to’o dader madrugada sira tenke hein tiha ona, mai atu to’o ba loke taka tiha ona, ida ne’e maneija birikrasia maka la efisiente. Ba tarata SIM, hela iha Dili tenke ba fali munisípiu tanba iha munisípiu sira lais liu,”hatete Joaõ.

 

Nune’e mós burokrasia iha Ministériu Edukasaun (ME) todan tebes, tanba atu legaliza de’it diploma sira tenke han to’o fulan.

 

“Birokrasia problema, ha’u rasik legaliza ha’u nia diploma ne’e, S1, S2, S3 iha Ministériu Edukasaun, ensinu superior ne’eba ne’e lori fulan ida ho balun, para legaliza tau karimbu de’it,”João lamenta.

 

Problema seluk maka iha Ministériu Finasas (MF), tanba durante ne’e estadu deve kompañia sira maka barak liu.

 

Nia husu ba futuru presiza hadi’ak sistema birokrasia iha Timor-Leste hodi nune’e bele fasilita populasaun no fó atendimentu ne’ebé di’ak liu ba povu.

 

Governu tenke tau matan ba problema sira ne’e. Deputasu sira mós bainhira halo fiskalizasaun labele ba de’it munisípiu para hetan perdiam maibé fiskliza mós iha instituisaun estadu nian hodi nune’e burokrasia iha instituisaun estadu nian lebele todan demais.

 

“Ita nia problema ida maka ita iha Ministériu Finansas ne’eba selu ita nia kompañia sira ne’e, prosesu atu selu ema de’it, deve barak la halimar. Deve de’it ita nia kompañia sira ne’ebé ho modal 10 mill, 5 mill sira ne’e laselu,”nia dehan.

 

Nune’e mós prosesu pagamentu hosi Banco Nasionál Centrál Timor-Leste (BNCTL), bainhira atu simu osan funsionáriu sira tenke forma. Tuir loloos tenke haree mekanizmu dia’ak hodi nune’e labele forma.

 

“BNCTL uluk ha’u iha ne’eba, ha’u hateten dehan labele ema forma, labele ema forma, to’o ikus agora ema sei forma nafatin de’it, que querdizer atetudi ka pelayanan ne’e maka laloos,”dehan nia.

 

Maske nune’e, Prezidente partidu PR ne’e rekoñese iha parte balun hanesan burokrasia iha Alfándega nian dadauk ne’e ladun todan ona, maibé iha parte Transporte, Emigrasaun, Edukasaun no banku sira maka sai problema boot.

 

“Burokrasia ne’e importante teb-tebes para it abele reforma, reforma ne’e to’o hún didi’ak,”dehan nia.

 

Tanba ne’e, bainhira partidu PR manan iha eleisaun maka partidu PR sei orienta nia ema hodi fó atensaun maka’as liu-bá birokrasia sira iha instituisaun estadu nian no instituisaun privadu sira hanesan Bancu Nasionál Ultramarinu (BNU).

 

Antonino da Silva hanesan joven ida mós lamenta ho prosesu halo passaporte tanba, dala barak joven sira tenke forma ho lina naruk no hein hosi dader madrugada to’o loron maibé dala barak la konsege halo passaporte.

 

Tuir nia prosesu halo passaporte lor-loron simu ema nain 60, 30 feto no 230 man, tanba ne’e, kuandu ema barak maka ba ne’e defisíl hodi halo passaporte. To’o notisia ne’e hatun seidauk iha konfirmasaun ho parte governu.

 

PM Rui nia Promesa

Maske nune’e, antes ne’e, Primeiru Ministru, Rui Maria de Araújo, promete kombate kultura burokratizasaun ne’ebé hanesan naha todan ida hodi invade servisu sira iha administrasaun públika.

 

“Ami nia prioridade mak kombate kultura burokratizasaun iha administrasaun públika, ne’ebé sai todan nafatin (hanesan elefante ida, ho ain halo ho tahu). VI Governu sei haka’as an, atu hafilak elefante ain-tahu ne’e, sai burokrasia ida kamán liu, profisionál liu, tékniku liu no ladún politizadu. Iha orden foun ne’e, méritu mak hetan fatin oin, la’ós buka-maluk eh buka-belun,be ikus mai hamosu kuaze sempre mediokridade, ka la iha kapasidade sufisiente hodi hala’o knaar. Kualifikasaun no kapasidade profisionál mak sei sai kritériu sentrál ba kolokasaun funsionáriu no asesór sira iha pozisaun oinoin,” Afirma Primeiru Ministru Rui Maria de Araújo iha nia diskursu, hafoin eis Prezidente Repúblika, Taur fó tomada de pose, iha Pálasiu Nobre Lahane, Segunda (16/02).

 

Entretantu nia dehan, Planu Estratéjiku Dezenvolvimentu Nasionál (PEDN) sei falta tinan 15, ne’ebé loloos ne’e sei julga iha tinan 2030.

 

Iha vida polítika Timor-Leste nian iha sirkunstánsia exesionál ne’ebé hamosu VI Governu Konstitusionál.

 

Nune’e mós parte ida atu kompriende momoos lójika ne’ebé pragmátiku, no hakarak serbí interese nasionál nu’udar kna’ar aas liu kualkér interese seluk nian.

 

“Ha’u hakarak re-afirma mós ha’u nia kompromisu no lealdade iha konstituisaun RDTL nia oin, iha lei no prinsipiu separasaun poderese nia oin, hodi kaer metin ba kooperasaun instituisionál ne’ebé ita presiza tebes, no mós respeitu ba kna’ar Xefe Estadu nian, ba kna’ar Parlamentu Nasionál nian, no ba kna’ar tribunál sira nian,” Tenik nia.

 

Nia dehan, bainhira laiha karik konfiansa hosi Partidu CNRT no parseiru rua seluk iha Bloku Koligasaun, inklui laiha karik aseitasaun hosi FRETILIN, Timor-Leste sei la marka istória foun.

 

Nia haktuir, lideransa antigu sira halo buat hirak ne’e, nu’udar sira halo beibeik ona, hodi tetu buat oioin, hodi haree ba nesesidade primordiál atu konsolida ita-nia demokrasia ne’ebé sei nurak hela.

 

Iha nia diskursu ne’e PM Rui esplika, lideransa tuan sira harii hela  instituisaun demokrátiku, no trasa hela buat ne’ebé abut, no valór ba demokrátiku ba Timor-Leste, hanesan, dame, rekonsiliasaun, solidariedade, pluralizmu, toleránsia no diálogu.

 

Nia hatete katak, era agora ne’e tenke iha asaun no prioridade, ba de’it kauza komún, konsolidasaun no dezenvolvimentu Timor-Leste nian.

Nu’udar jerasaun foun prontu simu desizaun saida mak lidernasa tuan oras ne’e planeia ona hodi fó poder ba foin sa’e sira.

 

“Ha’u sente onradu teb-tebes ba priviléjiu simu iha ha’u-nia kabás, knaar atu dirije hodi hatutan legadu husi ita-boot, no husi maun-boot sira hotukombatente Libertasaun Nasionál nian, libertasaun ida ne’ebé sei, no tenke kontinua nafatin, to’o ita Libertaita-nia Povu. Ha’u kompromete an atu koopera didiak, hodi kaer metin ba dinámika ekipa nian, ho ministru, vise-ministru no sekretáriu-Estadu sira, no liuliu ho Ministru ba Planeamentu no Investimentu Estratéjiku VI Governu Konstitusionál nian,”Refere iha nia diskursu kuaze oras haat ne’e. (dgx)

Similar Post You May Like

Recent Post

Banner

Online Hits

  • Online: 5 / 60 Hits: 658 / 200422
  •