TR Hahu Simu Lista Kandidatura ParPol

Wptimmaster 07:27:49 OTL Politika

DILI—Prezidente Tribunál Rekursu Deolindo dos Santos, husu ba partidu polítiku (parpol) 31 ne’ebé rejista ona hodi kompete iha eleisaun parlamentar tinan ne’e, atu hatama ona sira nian lista kandidatura tanba prazu ikus hatama lista kandidatura to’o iha dia 1 de Junhu, liu tiha loron ida ne’e Tribunal Rekursu sei la simu tan.    

 

Deolindo hatete, Tribunal Rrekursu sei la simu lista kandidatura rua hosi partidu ida, Tribunal Rekursu sei hasai kedas partidu ne’e tanba iha lei eleisaun parlamentar la permite atu partidu ida mai ho lista kandidatura rua.

 

“Ha’u sempre fó hatene partidu polítiku koligasaun sira katak lista kandidatura to’o dia um de Junu to’o to’o oras tuku 6 lokraik liu ona loron ne’e tribunal sei la simu tanba lei mak termina,”informa PTR Deolindo dos Santos ba jornalista iha edifísiu TR Caicoli, Sesta, (26/5).

 

Nia informa, to’o oras ne’e partidu hirak ne’ebé mai aprezenta ona sira nian lista kandidatura maka hosi partidu KHUNTO, PST. Hosi partidu 31 nebe rejistadu hamutuk partidu 27 mka  foti ona formulariu ba eleisaun parlamentar inklui partidu koligasaun 3.

 

UNDERTIM Hato’o Lista Kandidatura

 

Entertantu, tuir planu ohin, segunda, 29 de Maiu, Partidu UNDERTIM ba hato’o sira nian kandidatura ba Tribunal Rekursu.

 

Sekretariu Jeral Partidu UNDERTIM, Francisco Guterres (Manu Bui) ba Jornalista sira iha Sede UNDERTIM, Becusse, Sabádu, (27/5), hatete, lista kandidatura ne’ebé sira lori ba hodi kumpri prazu ne’ebé Tribuna Rekursu hasai ona.

 

“Tribunál Rekursu fó sai ona katak iha loron 1 Fulan Juñu final ba partidu polítika sira hatama ona sira nia lista, tanba ne’e ami hosi partidu UNDERTIM aprezente ka submete ami nia lista ba Tribunál Rekursu iha loron 29 fulan Maiu,sé karik ami lalori ba entaun partidu sei kansela no sei latuir eleisaun,”dehan Francisco.

 

Nia hatete, prazu ne’ebé Tribunal Rekursu fo badak tebes maibé sira pronto kolabora ho Tribunal Rekursu bainhira iha lista nebe sira aprezenta mosu erru ruma.

 

UNDERTIM hanesan partidu ida ne’ebé iha tinan 2005 konsege hetan kadeira iha Parlamentu Nasional, maibé iha eleisaun jeral 2012 UNDERTIM la hetan kadeira tanba akontese problema ho estrutura iha baze.

 

“Ami UNDERTIM uluk tinan 2005 hetan asentu iha parlamentu nasional, depois ami liu tiha kongresu nasionál, UNDERTIM nia estrutura nakfera, bainhira kuandu estrutura nakfera, iha tinan 2012 ami ne’ebé maka problema iha asentu parlamentu nasionál hanesan UNDERTIM, PUN, PSD, ASDT no partidu ne’ebé maka problema internál partidu, tanba ne’e ami laliu iha barreira parlamentu nasionál iha tinan 2012,”nia salenta.

 

Agora UNDERTIM hala’o fila fali konsolidasaun ba estrutura foun nomós dirijente foun, militantes foun ne’ebé maka hala’o iha teritoriu laran tomak.

 

“Foin dadauk mós ami UNDERTIM fó apoiu totalmente ba Lú—Olo sai Presidente Repúblika, tanba ami nia polítika ne’ebé presiza ita Timor oan tenke hamutuk, maske iha idolojia ketketak, maibé ita nia objektivu ne’e ida de’it, maka ita hadia povu Maubere nia moris,”nia haktuir.

 

Entaun UNDERTIM hakarak kandidatu nia membru ba parlamentu nasionál, sé karik povu fó fiar bainhira assume ona papel iha governu nomós parlamentu nasionál hakarak forma plataforma unidade nasionál, hodi besik ba povu, hodi  haree povu nia moris ne’e oinsa.

 

“Ami nia kandidatu membrus parlamentu nasionál mai hosi munisipiu sanulu resin rua ho rejiaun especial Oe—Cusse Ambeno, kada munisipiu ida ema na’in tolu, mais Dili maka barak liu, tanba Dili ne’e kapital nasaun,”Manu—Bui esplika. (yto/fer)

Similar Post You May Like

Recent Post

Banner

Online Hits

  • Online: 2 / 76 Hits: 1108 / 561555
  •