Kalbuadi Lay Husu Suspensaun hodi Servi Partidu Hasoru Elpar

Wptimmaster 21:58:10 OTL Politika

DILI—Sekretáriu Jerál  partidu Congresu Nasionál Rekonstrusaun Timorense (CNRT), Francisco Kalbuadi Lay hanesan Ministru Turizmu no Kultura (MTK) hahú husu suspensaun sem vensimentu hodi prepara partridu CNRT ba Eleisaun Parlamentár (ElPar).

Karta suspensaun, PM, Rui Maria de Araújo  simu ona hosi Ministru, Kalbuadi Lay.

“Por enkuantu seidauk, foin maka membru governu ida maka hatama, sinor Ministru Turizmu no Kultura maka hatama, husu Sespensaun durante fulan 2 nia laran,”PM Rui, hato’o ba jornalista sira iha Palasiu Governu, liuhosi Konferénsia Imprensa, Segunda, (29/05).

Xefe Governu esplika, suspensaun ne’e signifika, membru governu ne’e para, la halo servisu hanesan ministru, nia vensimentu hotu para.

Sekretária Estadu Arte no Kultura, Maria Isabél de Jesus Ximenes maka asumi hikas papél ministru nian.

“Suspensaun ne’e signifika, nia para nia la halo nia servisu hanesan ministru, ninia vensimentu hotu para hotu i depois Sekretária Estadu Arte no Kultura maka asumi nia papél,”Xefe Governu hateten.

PM Rui esplika, membru governu sira iha filiasaun polítiku partidária. Tuir lei ne’ebé iha, sé membru governu ne’e ba kampañia nia tenke husu suspensaun ba nia funsoens, nia tenke husu ferias para depois nia bele partisipa iha kampaña ka prepara nia partisu kompete iha eleisaun.

Bainhira membru governu ida husu suspensaun, la signifika servisu iha ministériu ne’e para, maibé iha nafatin tékniku hanesan Diretór Jerál, Diretór Nasionál sira hodi hala’o servisu iha ministériu.

Maske nune’e tékniku sira sei la define polítika foun, tanba funsaun define polítika foun iha ministériu sira ne’e mai hosi membru governu sira.

“Saida maka sei afeita bainhira membru governu sira husu lisensa  atu partisipa iha kampaña maka definisaun ba polítika foun sei laiha. Tanba membru governu sira nia responsabilidade importante maka define polítika ba instituisaun ne’e, kuandu nia laiha signifika labele mosu ema ida mai dehan agora tenke muda polítika,”Xefe Governu, esplika.

Tanba ne’e director jerál sira sei la halo definisaun ba polítika no la afeita ba implementasaun orsamentu tanba jestaun lor-loron nian la’o hela. Diretór Jerál sira kontinua hala’o servisu.

Antes ne’e Sekretáriu Jerál partidu CNRT, Francisco Kalbuadi Lay deklara ona iha Kongresu partidu CNRT iha Centru Convensoens Dili (CCD) foin lalais ne’e, hateten sei halo suspensaun hodi serví partidu CNRT, nune’e CNRT bele hetan vitória iha eleisaun parlamentár tinan ida ne’e. (dgx)

Similar Post You May Like

Recent Post

Banner

Online Hits

  • Online: 8 / 499 Hits: 3094 / 1058533
  •