Kazu Loke Prostitusaun iha Bar Kolmera Julga iha TDD

Wptimmaster 21:59:36 OTL Kapital

DILI—Tribunal Distrital Dili (TDD), segunda (29/05), hahú halo audensia julgamentu ba arguida na’in rua ho inisial EH no NK, sidadaun indonézia ne’ebe loke fatin prostitusaun iha restorante Bar Gostu Furak iha Kolmera, Dili.

Hodi hein prosesu iha tribunal, depois kaptura liu hosi investigasaun ne’ebe iha argiuda sira agora dadaun iha prizaun preventiva Bekora durante tinan ida ona.

Iha audensia julgamentu primeiru ne’e, tribunal lee sai akuzasaun ne’ebe aprezenta hosi Ministeriu Publiku (MP), konklui katak la iha indisius sufusiente hodi bele reduz akuzasaun kontra arguida  sira, nune’e submete ba tribunal ho objetivu bele realiza julgamentu no bele hetan kondenasaun ba pena ka medida seguransa, rona ba arguidu sira.

Alende arguida EH no NK ne’ebé mai husi Garut, Java, Indonezia, MP mos akuza arguidu OMB, DVC no arguidu CAM. Sira na’in tolu ne’e mane hotu nudar sidadaun timoroan.

Arguidu nain lima hetan akuzasaun halo atividade trafiku umanu (fa’an ema), inklui mos halao atividade explorasaun seksual ba ema seluk, la’o iha fatin barak-barak, iha pais ida ne’e rasik.

Atividade sira ne’e fasilita hosi arguida EH ho arguidu sira seluk. EH tama mai iha Timor Leste iha loron 20 de Setembro 2008. EH tama mai falita hosi arguida NK nudar alin rasik  mai servisu hamutuk iha Restorante Nada Bar ne’ebe lokaliza iha Kolmera, Dili.

Arguida na’in rua sai hanesan jerente iha restorante Nada Bar. Liu hosi opotunidade ne’ebe iha, arguida nain rua ne’e mos halo restorante foun ida ho naran Bar Gostu no Furak iha Nada Bar nia kotuk.

Aihan momentu ne’’eba bainhira restorante ne’e loke arguidu ho naran OMB maka sai nain ba Bar refere ne’ebe besik malu ho Nada Bar. Atu fasilita atividade Bar Gostu Furak no Nada Bar, arguida EH no NK rekruta no tansporta feto sira hosi Indonesia, ho naran kodigu Dasen, Karwaty, Tarweh, Anny, Ewy, Lilis, Oti, Warten, ho sira seluk tan kuaze nain 6 hanesan ne’e.

Feto sira ne’emai husi Garut no Suban, Java Loromonu. Arguida sira hatete ba feto indonézia sira ne’e katak rekruta feto sira mai iha Timor Leste atu hamaluk ema sira ne’ebe mai hemu iha BAR, atu nune’e bele hetan osan hosi serveja ne’ebe arguida sira faan iha Bar, kada serveja lata ida sira faan ho folin U$ 3.00.

Husi folin serveja $3.00 ne’e, arguida rasik hetan $2.50, no “karyawati” sira ne’e hetan $0,50 (centavos limanulu). Maibe realidade ne’ebe iha, hafoin akompaña ema sira ne’ebe mai hemu iha BAR, osan sira ne’e arguida EH no NK foti hotu no arguida sira obriga feto sira pasa vida hanesan prostituta iha Bar refere.

Arguida sira obriga feto sira ne’e nudar prostituta iha sira nia BAR komesa hosi tinan 2006 to’o tinan 2016. Hafoin hetan tiha detensaun hosi PNTL Ho PSIK atividade ida ne’e foin para.

Durante halo atividade refere iha Timor Leste, arguida EH no NK hetan detensaun dala tolu hosi polia kriminal investigasaun nasional (PNSK) no polisia sentifika investigasaun kKriminal (PSIK).

Iha loron 3 fulan setembru 2014, arguida EH hetan detensaun hamutuk ho prostitituta sira nain 6. Arguida sira hetan tarifa $50.00 ba atividade vitima sira nian ba kada ema bainaka ida. Kada bainaka ida kalan ida, vitima tenke hetan $80.00  atu bele intrega osan ne’e ba arguida sira. Kuandu fora hosi atividade ne’e, vitima sira tenki selu $400.00 kada ema ida selu ba arguida sira.

Tanba ne’e MP akuza arguida EH no NK ba kooautor  material ho forma kontinuadu ba iha konkursu real ba krime trafiku ho ema no krime explorasaun seksual hasoru ema seluk nia vida. Arguida sira halo hahalok ne’e ho livre maske arguida sira hatene katak lei iha Timor Leste bandu ba dalan ka atividade refere ne’ebe maka sira halao iha sira Bar.

Liu hosi audensia ne’e MP mantein akuzasaun no husu ba Tribubal atu aplika pena ne’ebe klean ba arguida sira atu nune’e labele hanorin sidadun timoroan sira lao tuir sira nia dalan.

Entretantu  bainhira Tribunal husu ba arguidu sira atu deklara faktu lolos, tuir akuzasaun ne’ebe iha, arguida sira hili dalan nonok. Katak rekoñese halo duni atividade ne’e iha restorante Bar Gostu Furak Kolmera.

Depois rona akuzasaun, Tribunal atu rona delarasaun sasin no vitima sira maibe sasin balu la marka prezensa. Nune’e Tribunal adia fila fali ba loron 16 fulan Outobru oras tuku 4 loraik. Tribunal mos fo orden ba arguida sira tenki fila Komarka Bekora hodi deskansa hein prosesu julgamentu tuir mai.

Audensia ne’e prezidi hosi juis Juis Antonino Helder, parte MP Prokurador Jacinto Babo, parte defeze arguda sira hetan asistensia legal hosi defensor publiku, Manuel exposto. (JXY/lj11)

Similar Post You May Like

Recent Post

Banner

Online Hits

  • Online: 3 / 199 Hits: 2177 / 555907
  •