Polisia Detein Angela Freitas

Wptimmaster 22:00:32 OTL Nasional

DILI—Polísia Nasionál Timor Leste (PNTL) Munisípiu Dili, ejekuta mandadu hosi Tribunál Distritál Dili (TDD) hodi detein Eis kandidatura Prezidente Repúblika (PR) ba períodu 2017-2022, Ângela Freitas.

Timor Post seidauk hatene loloos kazu saida mak Ângela komete, maibé tuir observasaun jornalista haktuir membru polísia sira horisehik, Segunda (29/05/2017), oras tuku 16:30 ba lori sai Ângela iha Sede Partidu Trabalista nian iha Bairo dos Grilhos, Dili, ba detein iha sela Komandu PNTL Munisípiu Dili.

Molok polísia tula Ângela ba karreta polísia ne’ebé para kedas iha Sede Trabalista nia oin, Ângela sei iha uma laran lê karta detensaun hosi TDD. Nune’e maske polísia ansi, Ângela konsege hetan entrevista ho jornalista Timor Post hodi hatete, nia kumpri mandadu detensaun ne’e maske nia konsidera nia laiha sala ida.

Ângela rekoñese iha duni kazu ida kona-ba sidadaun Iraun ida iha tinan hirak liu ba nia rasik maka atu fasilita tikete ba sidadaun ne’e fila ba nia rain, maibé ikus mai iha momentu ne’eba nia pasta mos lakon ho osan $ 4.500.

“Ha’u rasik sai vítima, iha momentu ne’eba ne’e hosi parte Amu Bispu telefone mai husu ajuda ba sidadaun ida hosi Iran ne’ebé ke hakarak fila ba nia rain, maibé dioseze laiha osan para atu hola tiketi, entaun husu ha’u nia prezensa iha ne’eba oinsá atu hola tiketi ba ema nia aman ne’e,” Ângela haktuir ba Timor Post maibé la konsege konfirma kona-ba Amu Bispu hosi Dioseze ne’ebé maka telefone ba nia.

“To’o ikus ha’u to’o iha ne’eba situasaun ne’e manas demais, iha ne’eba iha asaltu ida I ha’u rasik sai vítima to’o ha’u nia pasta mos sira lori lakon tiha ho osan U$.4.500. I to’o ikus ema nia aman ne’e hala’i lakon no polísia sira mos lakonsege kaptura ema nia aman ne’e entaun ema nia aman ne’e fila ba nia rai,” Ângela hatutan.

Ângela  dehan, agora kazu ne’e tinan sanulu ona komu laiha nasionalismu hosi parte tribunal entaun kazu ne’e kontinua nafatin iha notifikasaun ne’ebé ke mai i iha nia parte mos iha komunikasaun ho tribunal hodi hato’o katak kazu ne’e kansela total tanba ema ida ne’ebé ke atu ba aprezenta iha tribunal hosi responde ba kazu krimi ne’e nia laiha ona iha ne’e.

“Agora ema ida sai vítima ne’e mak ba aprezenta bei-beik iha tribunal tanba ne’e ha’u hanoin kazu ne’e la nesesáriu ona atu prosesa ba oin maibé ohin mai fali ho notifikasaun detensaun, ne’ebé ha’u hanoin tempu to’o ona atu hadi’a  ita sistema justisa,” Ângela hatete.

“Ita nia sistema justisa fraku tebes, ita haree  ohin loron ema sira ne’ebé ke involve krimi kontinua nafatin la’o livre I ita lakonsege halo kapturasaun hodi detein sira maibé mai fali kaptura ema sira ne’ebé ajuda ema seluk iha situasaun defisil”, hatete nia ho tristi.

“Ohin surat detensaun mai agora ha’u tenke ba iha prizaun Polísia  I aban ba julgamentu ho oras 09 meia I ha’u husu katakm públiku  tenke informadu tanba buat ne’e labele akontese, invez ema ida ne’ebé ke komete krimi ne’e mak tama iha sela laran, maibé la’e ema ida vítima mak tama fali sela laran, agora sira lori ha’u ba sela laran, aban mak ba julgamentu maibé ha’u sei koalia ho parte Polísia  Komandante para haree  tok kazu ne’e”, informa Ângela .

Iha lokraik ne’e kedan, Timor Post ba konfirma ho Segundu komandante munisípiu  Dili Superintendente Assistente Euclides Belo konaba Polísia  halo kapturasaun ba Ângela  Freitas hodi detein iha sela detensaun PNTL munisípiu  Kaikoli nian maibé iha nia parte konsidera kapturasaun ne’e sensitivu uitoan entaun nia laiha komentáriu. 

Tuir observasaun Timor Post iha sede partidu Trabalista nian, bainhira polísia  sira atu ba kaptura Ângela  Freitas iha ne’eba Polísia  balun hein iha liur no balun tama ba laran hodi hato’o karta notifikasaun ba Ângela  I bainhira sai mai Timor Post dada lia uitoan ho Ângela  konaba kazu refere maibé antes dada lia ne’e hotu Polísia  sira hein de’it iha karreta laran no balun bou katak “to’o ona ita ba ona”. (oro)

Similar Post You May Like

Recent Post

Banner

Online Hits

  • Online: 5 / 60 Hits: 612 / 200376
  •