FM Rekomenda Avalia Konsellu Superior Defeza - Seguransa

Wptimmaster 12:45:02 OTL Kapital

DILI— Fundasaun Mahein (FM) rekomenda ba Prezidente Repúblika  hanesan konsellu  superiór iha defeza  no seguransa atu halo avaliasaun ba iha parte defeza  no seguransa.

Tuir komunikadu ne’ebé maka diariu Timor Post asesu iha Kinta (01/06), haktuir FM nia rekomendasaun atu mantein komunikasaun ne’ebé efetivu entre Prezidente Repúblika ho orgaun soberanu sira. Hodi hotu-hotu hala’o nia kna’ar iha koridor ida tuir Lei no Konstituisaun nia haruka.

“Rekomenda ba Prezidente Repúblika presiza avalia servisu ne’ebé durante

ne’e hala’o hosi  Konsellu Superior Defeza no Seguransa nia funsionamentu

regular sira, iha ambitu nu’udar orgaun konsulta Prezidente Repúblika nian

ba materia defeza, seguransa no soberania nasional,” afirma Diretór FM, Nelson Belo, liuhosi komunikadu impresa.

Iha komunikadu ne’e nia informa, Prezidente Repúblika aumenta Pelotaun Guarda Onra nian iha Gabineti Apoiu Komandante Supremu Forsa Armada no Guarda Onra nian. Nune’e mos intensifika formasaun rekursu umanu iha nivel poliíiku no

tékniku ba meteria defeza no seguransa ne’ebé integra iha Casa Militar.

Iha komunikadu ne’e dehan, Casa Militar mantein servisu hamutuk ho organizasaun sosiedade sivil sira nia partisipasaun atu fo hanoin konstrutivu bá dezenvolvimentu instituisional nian iha ámbitu defeza no seguransa nian. Halo publikasaun ba relatóriu sira ne’ebé Casa Militar produs ne’ebé la’os konfidensial atu nune’e públiku bele hatene lalaok Prezidensia Repúblika nian no Casa Militar.

Entertantu iha komunikadu ne’e subliña, Prezidente Repúblika nia kna’ar atu garante unidade nasional no hanesan Komandate Supremu Forsa Armada Prezidente Repúblika iha responsabilidade boot liubá estadu nia funsionamentu regular, unidade nasional ho seguransa no soberania nasionál.

Hatete iha komunikadu ne’e katak, Iha ne’ebé Prezidente Repúblika de’it maka bele deklara funu no halo dame, no iha kompetênsia kompetênsia sira seluk tuir Konstituisaun nia haruka. Hodi asegura di’ak liu Prezidente Repúblika nia servisu tulun hosi  orgaun servisu seluk ba dezenvolvimentu asaun instituisional no promove prioridade polítika sira ne’ebé difine ona, Prezidensia Repúblika iha orgaun servisu ne’ebé fó tulun maka Casa Sivil, Casa Militar, Gabinete Prezidente Repúblika no Konsellu Administrativu.

Etertantu Monitorizasaun FM nia identifika,  Konsellu Superior Defeza no Seguransa hanesan orgaun konsulta Prezidente Repúblika nian la funsiona ho diak iha reuniaun Konsellu Superior Defeza no Seguransa. Nune’e durante ne’e la iha enkontru regular ne’ebé akontese. Iha ne’ebé tuir dadus ne’ebé FM asesu durante tinan 2012-2017, so iha de’it reuniaun maizumenus dala sanolu hosi  reuniaun Konsellu Superiór Defeza no Seguransa nian.

“Lolos durante tinan lima mandatu Prezidente Repúblika nian enkontru regular ka ordinariu Konsellu Superior Defeza no Seguransa nian tenke akontese dala ruanolu. Portantu tuir lei reuniaun Konsellu Superior Defeza no Seguransa akontese kada fulan tolu. Ho ida ne’e hatudu katak funsionamentu Konsellu Superiór Defeza no Seguransa la hala’o nia kna’ar ho diak tuir mandatu ne’ebé iha,” tenik iha komunikadu refere.

Kompetênsia Prezidente Repúblika nian nomeia no exonera Chefe Estado Maior General Forsa Armada nia (CEMGFA), Vice-CEMGFA no Chefe Estado Maior Forsa Armada nian sai polêmika iha tinan sira liu ba. Nune’e Governu no Parlamentu Nasional ho Prezidensia Repúblika ida-idak defende no debate maka’as tebes.

Maske nomeasaun ne’e tuir mandatu hosi  Konstituisaun no Estatutu Orgânika Forsa Armadas nian Prezidente Repúblika maka nomeia no exonera. Polêmika ne’e rezulta hosi  dezisaun final ida halo Prezidente Repúblika lasai lolos tiha hanesan Komandante Supremu Forsa Armadas. Ida ne’e justifika hosi  protesta ne’ebé superior militar nian lakohi sai hosi  militar, ikus mai hanaruk-tan sira nia mandatu ho alterasaun ba estatutu militar nian hodi hakotu polêmika entre Governu, Parlamentu Nasional ho Prezidente Repúblika.

Aleinde kompeténsia ho orgaun sira seluk, kna’ar konstitusional Prezidente Repúblika nian kona-bá kompetênsia iha relasaun internasionál. Prezidente Repúblika de’it maka iha dominiu kona-bá relasaun internasionál sira inklui asuntu defeza no seguransa nian.

Signifika katak akordu internasionál hotu-hotu tenke atraves hosi  reuniaun Konsellu Superior Defeza no Seguransa, iha prosesu ba akordu internasionál sira nian iha area defeza no seguransa. Maske nune’e FM hakfodak banhira Prezidente Repúblika Taur Matan Ruak durante nia mandatu hatete iha akordu, protokolu no memorandu sira entendementu barak maka Timor-Leste asina ho nasaun oin-oin, oituan de’it maka hetan implementasaun.

Nia hatutan embaixador sira keixa ba nia katak nasaun hotu-hotu hakarak asosia Timor-Leste nia susesu maibe akordu sira la implementa. Hanesan Prezidente Repúblika hatete tiha ona katak akordu kooperasaun barak maka la implementa no Governu rasik laiha baze dadus. Signifika katak durante ne’e la iha akordu ida ne’ebé debate iha Konsellu Superior Defeza no Seguransa, no dalaruma Governu la fo informasaun ida ne’ebé detallu ba Prezidente Repúblika kona-bá akordu sira ne’ebé asina.

Kuartu, Iha tinan 2014-2015 mosu insidenti ne’ebé provoka operasaun konjunta forsa Polisia no F-FDTL, no iha situasaun ikus liu ho operasaun ne’ebé involve militar to’o ’o Mauk Moruk mate. Mobilizasaun forsa seguransa hanesan estadu-de-sitíu ne’ebé la’o iha situasaun ida estadu de normalidade nian laran. Hetan protesta maka’as hosi  organizasaun sosiedade sivil no Provedoria Direitus Humanus no Justisa (PDHJ) kestiona operasaun ne’ebé halo iha asaun sira balu justifika kona-bá sirkuntasia sira uza forsa nian ka uza forsa la tuir lei uza forsa nian no regra empeñamentu. Nune’e mosu lamentasaun no keixa hosi  komunidade. Nune’e operasaun sira hanesan ne’e konsidera hanesan pratika aat ne’ebé hatudu iha polítika setor seguransa Timor-Leste nian. Ne’e hanesan lisaun prinsipal ida ne’ebé presiza avalia fila fali bainhira involve militar sira iha atuasaun seguransa interna nian.  

FM nian preokupasaun katak, banhira orgaun soberanu sira haree de’it ba sira nia kompetênsia no utiliza espasu legal sira hodi politiza asuntu sira nune’e. Sei sai dezafiu boot ba polítika ne’ebé diak ba dezenvolvimentu defeza no seguransa iha futuru.

“Buat ida ne’ebé hatudu ona ho kazu rua ne’ebé sita ona iha leten. Ba futuru labele iha tan militar ida maka rejeita dezisaun hosi  nia superior. Ironiku liu-tan militar ida halo petisaun depois kontinua ka rekondus hikas nia mandatu. Ida ne’e husik hela presedente ba futuru kona-bá nomeasaun no ezonerasaun hosi  Prezidente Repúblika hanesan Komandante Supremu Forsa Armada nian no kompetênsia sira ne’ebé tutela ba Prezidente Repúblika tuir Konstituisaun no lei sira nia haruka,” afirma iha komunikadu ne’e.(ino)

 

 

Similar Post You May Like

Recent Post

Banner

Online Hits

  • Online: 3 / 199 Hits: 2176 / 555906
  •