Lei Armas Brancas, Nesesita Polisia Bele Tiru

Wptimmaster 09:41:58 OTL Kapital

DILI— Prokuradória Jerál  Repúblika (PJR), José da Costa Ximenes, dehan, lei armas brankas la haruka Polísia Nasionál Timor-Leste (PNTL) tenke tiru ema, eseptu iha nesesidade no proporsionalidade. Katak, autór ka kriminozu ida ho forsa no kroat hasoru polísia.

“Iha lei ida ko’alia kona-ba tiru ne’e sira ko’alia kona-ba prinsípiu nesesidade no proposionalidade, la dehan katak lansung tiru,” PJR José da Costa Ximenes esplika ba jornalista sira hafoin informa situasaun kriminalidade iha rai laran ba Prezidente Repúblika, Francisco Guterres ‘Lú-Olo’, iha Palásiu Prezidensiál, Bairo-Píte, Dili, Tersa, (06/06).

Nia hatutan, tenke haree ba nesesidade tanba banhira no nesesita duni ka la’e atu tiru. Tanba proposionál duni ka la’e?.  Prinsípiu rua ne’e maka dehan iha ne’eba la’ós haruka tiru kedan ne’e la’e.

“Tanba ne’e maka atu tiru karik tenke haree nesesidade no prinsípiu  ida kona-ba proposionalidade, maibé nia lori fatuk oan ida tuda bosok de’it  mós tiru ona la’ós  ida ne’e,” nia subliña.

Nia esplika katak, lei ne’e antes atu tun ba kraik ne’e nia instrusaun ne’e nia dehan kedan iha leten ninia títulu ne’e prinsípiu  kona-ba nesesidade no proposionalidade.

“Tanba ne’e haree nia proposionalidade banhira maka nia bele tiru no haree mós nia proposionalidade nia tiru ne’e entre ho asaun ida ne’ebé  mai karik kontra nia ne’e proposionál duni ka la’e,” tenik nia.

Antes ne’e, governu liuhosi Ministériu Interiór (MI) hamutuk ho Polísia  Nasionál Timor-Leste (PNTL) fó hatene ba komandante distritál sira kona-ba lei armas brankas nian katak bainhira hosi Grupu Arte Marsiál (GAM) ataka Polísia  no lakohi rona entaun lei ne’e autoriza polísia  hodi uza forsa tiru.

Segundu Komandu Jerál PNTL, Komisáriu Faustino da Costa, hatete, sosializasaun ba lei armas brankas ne’e loron dahuluk hosi instituisaun PNTL liu hosi orientasaun Ministériu  nian tanba lei ne’ebé  atu sai ne’e faze ezekusaun tutela ba MI.

Tanba ne’e nia hatete, komesa organiza no bolu mos parte hosi relevantes hanesan estrutura tomak PNTL nian inklui mos Komisaun Reguladora Arte Marsiál (KRAM), Funsaun Públika, Diresaun Jerál  Alfándega  nomós Prokuradór Jerál.

Nia dehan, iha lei ida ne’e, lei númeru 05/2017 ne’e rejime de jurídiku  kona-ba  lei armas brankas, arte Marsiál no arte rituál nian nomós alterasaun ba iha kódigu  penál entaun hosi ne’e persiza komandante sira hodi intende didi’ak tanba iha artigu balun ne’ebé  autoriza autoridade seguransa polísia  atubele uza forsa.

Tanba ne’e, iha nia parte husu ba komandante sira iha teritóriu laran tomak katak, persiza intende didi’ak , tanba depois uza forsa komandante sira iha obrigatoriamente tenke relata halo relatóriu eskrita tanba saida maka uza forsa ne’e.

Faustino hatete, iha nia parte hanoin komandante sira hotu ohin loron marka prezensa iha ne’e hodi bele apar nomos akompañia karik intervensaun Ministru Interiór no Prokuradár Jerál  Repúblika (PJR) ninian kona-ba  lei ida ne’ebé  tur no lei ida ne’ebé  iha interese nasionál hodi asegura povu no rai doben ida ne’e.

“Karik iha ne’eba, ha’u atu dehan de’it  katak, iha artigu balun maka ko’alia kona-ba  uza forsa katak tiru bainhira la rona autoridade Polísia  sira nia intervensaun iha terenu”, informa Faustino ba jornalista sira iha Hotel Ramelau-Aimutin, bainhira halo koordenasaun ba preparasaun deziminasaun lei Nu.05/2017 rejime jurídiku  pratika arte Marsiál, rituál, armas brankas no rama ambon, Segunda (05/06).

Nia hatutan, iha artigu 18, 19 no 20 maka ko’alia kona-ba  autoridade Polísia  bele uza forsa no kilat hodi tiru bainhira hosi grupu sira asaltu malu iha terenu depois Polísia  halo intervensaun maka ataka fali autoridade seguransa entaun hosi artigu tolu ne’e autoriza Polísia  hodi tiru.

“Ha’u hanoin iha implementasaun koordenasaun ba lei ida ne’e, iha órgaun  fiskalizadór ne’e iha ne’ebá maka polísia  nasionál, órgaun  polisiál nomós Komisaun Reguladora Arte Marsiál,” hakotu Faustino.

Kona-ba situasaun kriminalidade iha rai laran, PJR José subliña, iha semana kotuk maka mosu kazu asaltu hosi grupu ida ba vítima sira iha Munisípiu Ainaro, no agora suspeitu sira hetan hotu ona kapturasaun hosi polísia no Tribunál Distritál Suai halo ona julgamentu no suspeitu hamutuk na’in 11 hetan prizaun preventiva iha prizaun Becora.

Entertantu informa mos situasaun iha Baukau Bukoli ne’ebé  uma ida hetan sunu, konsege ka’er  ema na’in 13 depois tribunál  distritál Baukau fó apresentasaun preodika suspeitu sira.

Ho kestaun hirak ne’e, Prezidente Repúblika, Francisco Guterres Lú-Olo, ba MP atu kontinua mantein servisu no halo esforsu para bele kombate kríme sira iha rai laran.

“Tanba ita-boot sira hatene besik ona eleisaun ne’e oinsá maka MP no polísia  sira la’o hamutuk ho didi’ak hodi bele iha kazu ruma akontese ita bele atua lalais,” nia haktuir.

Iha sorumutu ne’e mós PJR José haktuir, Prezidente Repúblika ninia preokupasaun boot ba kríme sira ne’ebé  akontese bazeia ba jeneiru hanesan violasaun sexuál abuzu sexuál hasoru menoridade sira ne’ebé  mete hosi padrasta no inan-aman sira entaun ida ne’e preokupasaun ida mós hanesan preokupasaun ba Prokuradór Jerál  Repúblika nian. (ino)

 

Similar Post You May Like

Recent Post

Banner

Online Hits

  • Online: 5 / 60 Hits: 681 / 200445
  •