Kapital

“Promete hola motór mais to’o agaora ha’u la hetan buat ida”

Nia bolu MH mai konsege estraga ha’u

Turki Reis | Tersa Feira, 16 Mei 2017 - 09:47:02 OTL | read: 338

DILI—Deskonfia inan-feton ida ho naran inisiál FMC fa’an labarik minoridade ba ema riku-na’in (emprezáriu) ida iha Dili ho naran inisiál MH, tanba ne’e Xefe Suku Lahane Orientál, Trindade de Pinto Baptista husu ba parte kompetente tenke sériu loke investigasaun ba kazu refere.

Vítima ho autór ne’e deskonfia hosi aldeia Sare, suku Lahane Orientál, postu administrativu Nain Feto, munisípiu Dili.

Tuir dadus  ne’ebé mak Timor Post asesu hosi família labarik katak, ema ida fa’an labarik ho naran inisiál FMC ba ema riku-na’in balun ho inisiál MH.

Labarik sira ne’ebé sai vítima inisial LDC ho tinan 14  no inisiál OLLO idade 15 no FMC nia oan rasik ho naran inisiál LD tinan 13.

Kazu ne’e rasik akontese iha tinan 2016 no família foin keixa iha loron 17 fulan Marsu tinan 2017.

Vítima LDC konta, nia tian bolu nia ho nia oan feto atu ba fatin ida, maibé ba fali nia kolega nia uma iha Surikmas.

To’o iha ne’ebá (Surikmas), nia (vítima nia tian) haruka tuur, tia FMC nia kolega ne’e nia oan feto fó dellos ba sira hemu.

“Agora imi haree to’ok antara sira na’in-rua ne’e ida ne’ebé maka boot, depois tia  mós konta ba MH dehan, ha’u (vítima) SMP kelas 1, eskola asrama, nia oan feto ne’e SMP kelas 2, mais padahal ha’u foin SD kelas 6, iha ne’ebá MH hatudu ba ha’u dehan ha’u maka boot, tia FMC dehan nia (vítima) maka boot, tanba durante ne’e nia iha asrama foin mai, ne’e maka sira hotu hakfodak, depois tia FMC, MH ho tia nia kolega ne’e sira bisu-bisu malu ko’alia saida, ha’u lahatene,  sira lori fali ha’u mai uma,” haktuir vítima LDC ho tinan 14 ba Timor Post, iha aldeia Sare, suku Lahane Orientál, Domingu (14/5).

Liutiha loron ida, FMC lori nafatin vítima LDC iha Surikmas,  maibé LDC haruka vítima troka tiha.

“Ha’u troka tiha ropa hatais vistidu-mutin, depois tia  FMC nia oan ne’e, catok  tiha ha’u nia fuuk, pinta ha’u nia ibun, make up ha’u nia oin hotu, sira telefone ba  MH mai lori ha’u, ami to’o iha Matadoro, ami tuur, ami haan hotu, MH lori tia FMC ho nia kolega ba MH nia ruangan, xave tiha odamatan, husik hela ha’u ho MH mesak, ne’e maka MH lori ha’u ba kuartu laran xave odamatan, haruka ha’u hasai ha’u nia ropa hotu. Ne’e maka ha’u lakohi, ha’u sai tiha fali mai liur MH ba loke odamatan lori tia FMC mai, tia hamaus ha’u, maibé ha’u lakohi,  tia kontinua hamaus ha’u dehan o tenke hakarak, see o lakohi ne’e, amá L mate ona (vítima nia tian naran istimadu) ho inisiál FMC,”

“Amá L esplika ba ha’u, amá L mós hakat tiha rai-kuak tolu ona no amá L mós halo tiha juramentu,  ne’e mós ha’u lakohi nafatin, nia obriga. Ha’u dehan ba amá L, see karik, ha’u maka hatene antes, ha’u mós lakohi mai ida, ha’u lakohi nafatin, nia foti imajen Santo António ho São Miguel tau iha meja leten, amá L hamulak fuik, dehan amá L hakat tiha rai kuak tolu ona, see karik o lakohi, amá L mate ona,” haktuir vítima ho tinan 14 ne’e.

Liu tiha semana ida, FMC lori LDC ba dirize misa iha Becora, FMC bolu tuir vítima, maibé vítima lakohi. FMC kontinua tuir vítima (LDC) ba Igreza laran.

“Ha’u lakohi, nia obriga nafatin de’it, ikus mai  amá L  konsege lori fali ha’u ho nia oan feto ba lansung  ba MH nia uma, MH toba hamutuk ho tia nia oan ne’e, depois MH husu ha’u, ha’u lakohi, nia lori ha’u ba kuartu laran, obriga ha’u halo tan (toba hamutuk), hotu  promete mai ha’u dehan, hola motór fo ha’u ho ha’u nia tia nia oan feto,  maibé to’a agora, ami la hetan motór to’o agora,” informa labarik minoridade ne’ebé sai vítima asaun tráfiku umanu ne’e.

“Obriga ha’u, lori ha’u tama ba kuartu laran, nia hasai ha’u-nia roupa, nia haruka ha’u  kabala tolla, nia bolu MH mai konsege estraga ha’u, ha’u la sadar aan tiha, depois nia promete dehan hola motór ida fo mai  ha’u, mais to’o agaora ha’u la hetan buat ida,” 

Vítima nia Inan ho naran inisiál ML konta ba Timor Post katak, antes ne’e nia lahatene, maibé lori fali  nia oan feto  ho naran inisiál OLLO ho LDC ba MH.

“Ha’u bolu labarik mai, ha’u husu sira, ha’u haruka nia bin sira husu ba ha’u nia oan rasik, nia dehan loos duni, tanba tia FMC hatete ami dehan labele hatete sai, tanba FMC tau  estátua tolu iha meza leten halo juramentu ba labarik sira dehan “ha’u hakat liu ona rai kuak tolu maka ha’u lori imi mai iha ne’e”. Ne’e maka labarik sira ta’uk lakohi ko’alia sai, to’o lori fali ha’u nia oan ne’e ba ho tan nia prima ho tan nia oan hahoris rasik mós lori hotu ba MH, mai maka labarik sira konta fali mai ha’u,” dehan vítima nia inan iha aldeia Sare, suku Lahane Orientál.

Parte família mós aprezenta labarik vítima sira ba Rede Feto, FOKUPERS no Uma Mahon inklui mós ba Ministério Públiklu (MP).

Tuir informasaun ne’e parte vítima simu katak, iha loron Segunda (15/05) sei presta deklarasaun iha Ministériu Públiku. 

Iha parte seluk, labarik vítima ida tan ho naran inisiál OLLO mós konta katak, FMC bolu nia atu ba merkadu Taibessi, dehan hola sapatu.

Hafoin to’o merkadu, MH hein ona iha merkadu Taibessi, entaun MH haruka sa’e karreta lori ba nia uma iha Surikmas, iha tinan 2016 liuba.

“MH mai tula ha’u ba uma iha Surikmas, ami haan tiha hahan, MH hatete ba ha’u dehan, nia fila hosi Bali mai maka hasai ha’u nia perawan, ha’u mós ta’uk ona, ha’u hatete sai ba ha’u-nia amá dehan tia (FMC) lori ha’u ba MH nia uma, tia rona tiha ha’u, tia haruka nia oan mai husu ha’u, tanba ne’e ema sira iha ami nia bairru ne’e ema hotu hatene ona,” dehan vítima OLLO ho tinan 15 ne’e.    

Purtantu, Xefe Aldea Sare, Luis da Silva Castro haktuir, informasaun ka isu fa’an labarik ba ema riku-na’in ne’e ne’e vítima sira la halo keixa.

Luis haktuir, família sira hanesan subriña, kuñada rezolve  uma-laran, maibé laiha solusaun, to’o ikus sira bolu hasoru autoridade lokál mak foin deskobre.

“Kazu ne’e nia istória katak, ha’u-nia komunidade balun lori fali labarik sira ba fatin ne’ebé maka la merese ba labarik sira, labarik sira mai konta fali ba nia família maka foin deskobre, tanba ne’e ami parte  lider komunitária foin hatene. Ba ha’u, ida ne’e kontra ita nia lei, tanba ne’e hanesan autoridade lokál prontu akompaña kazu ne’e to’o hetan lialoos,  hosi parte justisa nian, no kazu hanesan ne’e la’ós kompeténsia autoridade lokál nia, ne’e tribunal maka hatene,” Xefe Aldeia Sare, Suku Lahane Orientál ba Timor Post,  Domingu (14/05).

 Iha fatin hanesan, Xefe Suku Lahane Orientaál,  Trindade de Pinto Baptista konsidera kazu ne’e hanesan krime organizadu, tanba prátika tráfiku umanu.

Tanba ne’e, xefe suku ho xefe aldeia laiha kompeténsia atu rezolve, tanba kategoria krime, entaun Tribunál mak bele rezolve.

 “Ha’u husu ba Tribunál atu la’ós julga de’it autór ne’ebé maka hanesan sai fontes hodi labarik sira ba, maibé buka mós ema ida ne’ebé benefisiadu, tribunaál labele julga de’it ema ida ne’ebé’ maka sai fontes, ema ida ne’ebé maka sosa ema ne’e mós nia tenke hatán hotu iha tribunál,” sujere Xefe Suku Lahane Orientál, Trindade de Pinto Baptista. 

Iha parte seluk, deskonfia suspeitu feto ho naran inisiál FMC konta ba Timor Post iha nia rezidénsia aldeia Sare katak, ita Timor ne’e ema Katólika.

FMC afirma, maske ita kiak, la-haan, la-hemu mos ita nunka  fa’an fali ita nia oan sira ba ema seluk.

“Ne’ebé agora dadaun, ha’u prontu atu ba hatan katak  fa’an ne’e halo nusá, sá data, sá loron, sá fulan maka ha’u fa’an labarik sira. Ha’u lori labarik sira ba merkadu Taibessi hola ropa ne’e ha’u ba, mais dehan fali ha’u lori fali ba Matadoro ne’e ha’u lahatene, ne’ebé husu ba labarik sira,  nu’udar oan iha tempu ha’u lori sira ba acara ruma,  ami ba, mais dehan lori sira ba fa’an ne’e ha’u la lori ba fa’an, ne’ebé ha’u mós sei buka tuir sá data, sá loron maka ha’u lori ba fa’an, ne’e ha’u sei buka tuir,” haktuir FMC.

Maske FMC rezeita, maibé FMC rasik deklara, iha iha loron 13 fulan Marsu sira atu rezolve tuir família nain, maibé rona fali informasaun seluk, entaun kontinua ba prosesu legál.

“Ha’u la-hatene, maibé ha’u hein de’it aban tuku 02:00 (ohin red), ha’u (FMC) ba hataán iha Ministerio Públiku.”

Ho azu ne’e, Timor Post kontaktu fontes ho naran inisial MH  ne’ebé família labarik deskonfia katak FMC fa’an ba nia (MH) ne’e ba Timor Post liuhosi telefone katak, maibé MH rasik seidauk hatene informasaun ne’e.

 “Ooo... ida ne’e ha’u la hatene buat-ida, ha’u seidauk hatene situasaun ida hanesan ne’e, ha’u seidauk iha buat ida atu responde.  Kona-ba ida ne’e só advogadu sira maka hatene, tanba ha’u seidauk hatene situasaun sira hanesan ne’e no masalah ida ne’e sedauk kona ha’u ida, ne’ebé maun sira (jornalista) atu husu ida ne’e ba ha’u tanba ha’u sente ha’u seidauk iha problema ida,” dehan MH ba Timor Post, Domingu (14/5).

Maske nune’e, iha loron Sesta (12 /05) Timor Post halo konfirmasaun  ho komandu PNTL Munisípiu Dili, liuhosi Segundu Komandante Munisípiu Dili, Superintidente Asistente, Euclides Belo, rekoñese kazu ne’e, maibé kazu ne’e parte polísia nasionál maka ka’er direitamente. (cio)

 










Komentar Via Website : 0


Name

Email

Comment



Enter the 6 code above)