Nasional

Prezidente Republika Preokupa Tentativa Influensia Independensia Judisial

Turki Reis | Kinta Feira, 11 Mei 2017 - 18:11:25 OTL | read: 1253

DILI—Prezidente Repúblika  (PR), Taur Matan Ruak, preokupa tebes ho tentativa hosi Parlamentu Nasionál liuhosi aprova rejolusaun atu influensia independénsia judisiál iha Timor Leste.

Liuhosi komunikadu imprensa ne’ebé  Timor-Post asesu iha Palásiu Prezidénsial, Kuarta, (10/05) haktuir, Prezidente Repúblika rezolusaun Parlamentu Nasionál ne’ebé rekuza nomeasaun Prezidente Tribunál Rekursu no extensaun Prokuradór Jerál Repúblika.

Iha komunikadu ne’e subliña, Prezidente Repúblika lembra hikas fali kona-ba importánsia hosi prinsípiu independénsia judisiál hodi asegura instituisaun demokrátika sira-nia lala’ok regulár no hamosu konfiansa iha atór judisiál sira, atu nune’e sira prontu hanesan baibain atu hasoru presaun hirak hosi li’ur no lori povu nia naran halo nafatin justisa nu’udar sira-nia knaar loroloron nian. Tribunál Rekursu oras ne’e daudaun halo hela fiskalizasaun konstitusionalidade ba lei importante lubuk ida, períodu atu hatama kandidatura ba Prezidente Tribunál Rekursu ba eleisaun lejizlativa mós hahú ona no

Prokuradoria sei halo hela investigasaun hirak ne’ebé importante. Tanba ne’e maka iha momentu ne’e fundamentál atu apoia ita-nia instituisaun judisiál sira, liuliu hasoru tentativa instrumentalizasaun partidária.

Harii Estadu Direitu la’ós de’it Konstituisaun mak haruka halo, maibé mós solusaun di’ak liu hotu atu harii Estadu ida ne’ebé hetan respeitu no konfiansa hosi sidadaun sira, investidór nasionál no estranjeiru sira no Estadu sira seluk, inklui mós organizasaun internasionál no parseiru sira. Prezidente Repúblika hein katak sidadaun hotu-hotu tau iha prátika valór sira-ne’e durante debate polítiku nasionál.










Komentar Via Website : 0


Name

Email

Comment



Enter the 6 code above)