Politika

Rekuza PTR Deolindo, PD Kontra Fretilin ho CNRT

Turki Reis | Kuarta Feira, 10 Mei 2017 - 18:47:24 OTL | read: 3532

DILI—Parlamentu Nasionál, tersa, (9/5), aprova rezolusaun númeru 33/III hodi la retifika nomeiasaun Juiz Deolindo dos Santos ba kargu Prezidente Tribunál Rekursu (PTR). Rezolusaun ne’e pasa ho votus afavór 46, kontra 6 no abstensaun O.  

Ho rezultadu ne’e, Parlamentu Nasionál la retifika Prezidente Supremu Tribunál de Justica, Deolindo dos Santos ne’ebé  maka Prezidente Repúblika Taur Matan Ruak nomeia iha loron 28 de Abril, foin lalais.

“Parlamentu nasionál aprova rezolusaun No. 33/III hodi rekuza no la retifika nomeiasaun Juiz Deolindo dos Santos ba Prezidente Tribunál Rekursu, tanba ne’e ami nia funsaun hodi ezerse funsaun kona-ba retifikasaun tuir artigo 95 nº 3 alinea a, ne’ebé hatete retifikasaun ba Prezidente Supremu Tribunál, bazeia ba mandatu ida ne’e,”hatete Deputadu bankada CNRT, Arão Noé iha Parlamentu Nasionál, Tersa, (09/5).

Arão hatete, ida ne’e aktus normal ida Parlamentu halo tuir mandatu konstitusionál, aktus ida ne’e bele mós ba Prezidente atual agora no bele mós ba Prezidente eleitu ne’ebé maka atu simu tomada de posse iha 20 de Maiu mai.

Arão hatutan, ho aprovasaun ida ne’e, agora kabe ba Prezidente Repúbliku ne’ebé nomeia, atu hasai ka atu mantein, ida ne’e kompeténsia  Prezidente Repúblika nian.

Iha fatin hanesan, Prezidente Bankada FRETILIN, Aniceto Guterres hatete, sira rekuza la’os signifika la aseita ho nomeiasaun ne’ebé  Prezidente Repúblika Taur Matan Ruak halo, maibé tanba antes halo nomeiasaun la liu hosi PN ne’ebé  tuir lei persiza halo retifikasaun.

“Ita la kestiona Prezidente Repúblika atu halo nomeiasaun ba Prezidente Tribunál, juridikamente Prezidente Repúblika iha direitu tomak atu halo nomeiasaun ida ne’e iha artigu 86 konstituisaun, lei la bandu Prezidente Repúblika atu halo desizaun bainhira mandatu besik remata, maibé ne’e kestaun étika no kestaun polítika,”nia dehan.

Parlamentu Nacional foti aktu ida ne’e bazeia ba Konstituisaun RDTL artigu 86, númeru 3, alina K no artigu 133 numeru 3 inklui Estatutu Ministeriu Públiku  artigu 12 numeru 1, 2 no artigu 83.

Portantu, Deputada bankada Partidu Demokrátiku (PD), Lurdes Bessa hatete, bankada PD la konkorda ho rezolusaun ne’ebé  aprezenta hosi bankada FRETILIN no CNRT tanba la’os foin akontese ba ida ne’e, maibé iha tinan hirak ba kotuk PN mós la halo retifikasaun ba eis PTR Guilhermino da Silva no eis PTR Claudio Ximenes.

“Ami lakonkorda proposta rejulusaun ida ne’e, ami lakonkorda kedas iha ninia paragrafu II hatete, tem sido intendementu pacifico, tanba la’ós entendementu pacifico Ha’u fó hanoin fila fali, katak dala rua ona parlamentu nasionál ida ne’e lahalo prosesu  ratifikasaun ba nomeisaun presidente tribunál rekursu, ha’u fila fali ba rejulusaun 2013 ninian, kualker rejulusaun hanesan mós proposta ida ne’e,”nia esplika.

Tuir observasaun, Iha loron hanesan Parlamentu Nasionál  aprova mos rejulusaun No. 34/III hodi husu ezonerasaun emediata ba Prokurador Jeral da Repúblika, José da Costa Ximenes, atu labele kontinua nia mandatu. Rezolusaun ida ne’e liu ho votu afavor 46, kontra 6 no abstensaun 0.










Komentar Via Website : 0


Name

Email

Comment



Enter the 6 code above)