Nasional

Tilman Konsedera Deputadu Dudu Golpe Estadu Juridiku

Turki Reis | Kuarta Feira, 10 Mei 2017 - 18:03:17 OTL | read: 2952

DILI-Tuir pontu de vista eis membru Parlamentu Nasional, Manuel Tilman kona-ba aprovasaun ne’ebé  Parlamentu Nasionál halo hodi rekuza Nomeasaun Prezidente da Republika ba Prezidente Tribunal de Rekursu konsidera iha interese polítika  hosi CNRT no FRETILIN.

Tuir Manuel Tilman, karik PN la ratifika tanba de’it atu hili fali Juis seluk ne’e interese pessoál ona, interese nasaun nian laiha ona.

“Señor deputadu Aniceto (deputadu, Aniceto Guterres-red) ko’alia bar-barak ne’e karik tanba nia hakarak nia kaben maka atu sai Prezidente, doutora Natercia (Juiza Maria Natércia Gusmão-red), nia bele sa’e hela, ne’e mós kompetente maibé Prezidente la hili ne’e, Konselhu Superior de Lejislatura la indika doutora Natercia, indika tiha fali Doutór Deolindo ne’ebé ita tuir regra ba, omilde oituan, deputadu Aniceto maka ba halo fali barullu hanesan ne’e, povu hanoin saida,”jurista Manuél Tilman, hateten.

Nia konsidera bankada FRETILIN no CNRT lakohi atu kria pas no estabilidade iha nasaun ida ne’e, loloos sira ratifika nomeisasaun ne’e tanba ida ne’e desizaun presidente republika ninian, se PN la aseita nomeiasaun ida ne’e bele prejudika interese nasaun. Tanba Deolindo ne’e Prezidente Tribunál Rekursu ne’ebé nomeia hosi Prezidente Repúblika (PR) actual, Taur Matan Ruak.

Tanba ne’e nia fiar katak, Prezidente Repúblika (PR) eleitu, Francisco Guterres “Lú-Olo” sei la anula nomeiasaun xefe estadu, Taur Matan Ruak nian ba Prezidente Tribunál Rekursu (TR), Deolindo dos Santos.

“Nia (Lú-Olo-red) la anula, Lú-Olo sei la halo ida ne’e, Lú-Olo halo buat ne’e, ne’e dehan golpe de estadu jurídiku, ne’e Lú-Olo sei la halo, katak Golpe do Estadu ida iha Palasiu do Prezidente, ne’e ha’u hanoin Lú-Olo la halo,”hatete Manuel Tilman ba Timor Post iha nia servisu Fatin, Hotel Garden Beatch, Praia dos Coqueirus-Dili, Tersa, (09/05).

Nia hatutan, xefe estadu eleitu mós sei sukat konsekuensia hosi rezultadu ba nasaun ne’e. Buat ida ne’ebé maka boot liu iha nasaun ne’e maka paz no estabilidade.

PR iha kompeténsia hili Prezidente TR no fó posse públika iha bulletin ofisiál, maibé antes halo desizaun ne’e iha mós koresponsabilidade katak Parlamentu mós ratifika, kuandu la ratifika ne’e tenke fó rajaun no sukat konsekuensia.

“Husu de’it deputadu FRETILIN ho deputadu CNRT, sira hakarak estabilidade iha Tribunál, estabilidade sosiál katak ema oho malu, baku malu lor-loron prosesu ne’e tuir ninia liña ne’e sira hakarak Tribunál funsiona loloos ka lae?,”dehan Nia.

Nia hatutan, deputadu bankada CNRT ho FRETILIN tenke sukat konsekuensia Tribunál nian, tanba Tribunál maka paralizadu iha TR, prosesu kazu rihun ba rihun paradu hela iha TR, tanba de’it

Jurista ne’e afirma, xefe estadu nia desizaun sei la muda, tanba la ratifika la signifika tenke anula kargu Prezidente TR nian.

“Prezidente Repúblika nia desizaun hotu, hotu ona, la muda, ratifika la signifika anula posse, ne’e laiha ida. Prezidente iha kna’ar, kompeténsia  únika hili no fó posse,”Tilman, hateten.

Nia esplika, sekarik ba Prezidente Tribunál Administrativu Fiskál ne’e oin seluk, ne’e signifika katak, Juizes sira ne’ebé tuur iha Tribunál Administrativu Superior maka hili Prezidente, xefe estadu fó posse, maibé kona-ba Prezidente TR ne’e oinsá seluk, xefe estadu iha kna’ar hodi hili no fó posse, tanba iha kointerdependénsia tanba ne’e maka tau iha konstituisaun entaun Parlamentu mós iha responsabilidade hodi ratifika.

Iha konstituisaun hatete buat rua ne’ebé la hanesan, Prezidente Repúblika maka hili Prezidente TR, laiha tan buat seluk, maibé ratifika ne’e nia konsekuensia ne’e saida, anual posse ne’e laiha, tanba la hateten iha Konstituisaun dehan katak anula. Ratifikasaun ne’e polítika dependénsia inter soberania.

“Ha’u husu barak maka partidu FRETILIN ho CNRT hanesan bankada parlamentár maioria iha parlamentu, sira maka kaer hela governu dadauk agora ne’e, sukat konsekuensias Tribunál nian,”eis deputadu ne’e husu.

Prezidente iha kna’ar hili Prezidente Tribunál Rekursu, fó tiha ona posse, deputadu sira la ratifika tenke sukat konsekuensia nasaun, rezultadu la retifika ne’e boot liu estabilidade judisiáriu iha nasaun ida ne’e.

Antes ne’e deputadu hosi bankada CNRT no FRETILIN hato’o ona proposta ba mesa PN para labele ratifika nomeiasaun Prezidente Repúblika (PR), Taur Matan Ruak nian ba Prezidente TR, Deolindo dos Santos.










Komentar Via Website : 0


Name

Email

Comment



Enter the 6 code above)